भद्रपुरमा बुद्ध एयरको जहाज दुर्घटना, अस्थायी रूपमा छोटो रनवे प्रयोग गरी उडान सुचारु

Share this
642shares
मुलुकी खबर
मुलुकी खबर
clock२०८२ पुस १९, शनिबार १६:१३

विराटनगर । भद्रपुर विमानस्थलमा शुक्रबार राति भएको बुद्ध एयरको जहाज दुर्घटनापछि रनवे छोट्याएर विमानस्थल पुनः सञ्चालनमा ल्याइएको छ ।

काठमाडौंबाट भद्रपुरका लागि उडेको बुद्ध एयरको एटीआर–७२ जहाज अवतरणका क्रममा रनवे पार गर्दै पूर्वतर्फ करिब ३ सय मिटर अगाडि पुगेर दुर्घटनामा परेको थियो । उक्त घटनाले केही समय विमानस्थलको नियमित सञ्चालन प्रभावित भए पनि आवश्यक प्राविधिक व्यवस्थापनपछि हाल विमान आवतजावत सुचारु गरिएको विमानस्थल प्रशासनले जनाएको छ ।

विमानस्थल प्रमुख किशोरकुमार खत्रीका अनुसार दुर्घटनाग्रस्त जहाजको पछाडिको भाग रनवे बाहिर ‘अफ–ट्रयाक’ क्षेत्रमा अड्किएकाले तत्काल पूर्ण रनवे प्रयोग गर्न सम्भव नभएको हो । सोही कारण सावधानीका रूपमा रनवे लम्बाइ १ हजार ५ सय मिटरबाट घटाएर १ हजार ४ सय मिटरमा सीमित गर्दै विमानस्थल सञ्चालनमा ल्याइएको उनले बताए ।

उनका अनुसार हाल प्रयोगमा ल्याइएको १ हजार ४ सय मिटर रनवे विमान सञ्चालनका लागि प्राविधिक रूपमा पर्याप्त छ । खत्रीले रनवे छोट्याएर सञ्चालन गरिएको विषयमा सबै पाइलटलाई नियमित रूपमा जानकारी गराइँदै आएको स्पष्ट पारे ।

आउने र जाने प्रत्येक उडानका चालक दललाई हालको रनवे अवस्था, उपलब्ध लम्बाइ र आवश्यक सावधानीबारे अग्रिम जानकारी दिइएको उनको भनाइ छ । ‘विमानस्थल सञ्चालनका लागि न्यूनतम प्राविधिक मापदण्ड पूरा भएको छ । जहाजको पछाडिको भाग अफ–ट्रयाकमा परेकाले रनवे केही छोट्याएका हौँ । अहिले १४ सय मिटरमा विमानस्थल चलिरहेको छ । त्यो लम्बाइ जहाजका लागि पर्याप्त छ,’ उनले भने ।

शुक्रबार राति करिब ९ बजेर १० मिनेटमा अवतरण गर्ने क्रममा जहाज रनवेबाट बाहिर गएको थियो । दुर्घटनाका बेला मौसम पूर्ण रूपमा सफा रहेको र दृश्यता राम्रो भएकाले मौसमका कारण घटना नभएको विमानस्थल प्रशासनको प्रारम्भिक निष्कर्ष छ । खत्रीका अनुसार विमानस्थलको तर्फबाट हेर्दा त्यतिबेला दुर्घटना हुने खालको मौसम अवस्था थिएन ।

दुर्घटनाको वास्तविक कारण भने हालसम्म यकिन हुन सकेको छैन । प्रारम्भिक अनुमानमा प्राविधिक कारण हुनसक्ने आशंका गरिएको छ । तर, यसबारे विस्तृत प्राविधिक अनुसन्धानपछि मात्रै ठोस निष्कर्षमा पुग्न सकिने खत्रीले बताए । ‘विमान दुर्घटनाको ठ्याक्कै कारण अनुसन्धानपछि मात्रै थाहा हुन्छ । अहिले तत्काल हेर्दा मौसमको कारण होइन । प्राविधिक पक्षबारे सम्बन्धित प्राविधिक टोलीले अनुसन्धान गरेपछि मात्र वास्तविक कारण खुल्छ,’ उनले भने ।

दुर्घटनाग्रस्त जहाजमा ५१ जना यात्रु, ४ जना चालक दलका सदस्य र १ जना इन्जिनियर गरी कुल ५६ जना सवार थिए । दुर्घटनामा को–पाइलट सुशान्त श्रेष्ठसहित ७ जना यात्रु घाइते भएका थिए । घाइतेमध्ये को–पाइलट श्रेष्ठको टाउको र अनुहारमा चोट लागेको छ र उनको भद्रपुरस्थित ओमसाई पाथीभरा अस्पतालमा उपचार भइरहेको छ । अन्य ६ जना यात्रु भने सामान्य उपचारपछि डिस्चार्ज भइसकेका छन् ।

हाल दुर्घटनाग्रस्त विमानलाई रनवेबाट हटाउने काम जारी रहेको विमानस्थल प्रशासनले जनाएको छ । जहाज हटाइसकेपछि रनवे पुनः पुरानै लम्बाइमा सञ्चालन ल्याउने तयारी गरिएको छ । यसबीच यात्रुको सुरक्षालाई प्राथमिकतामा राख्दै अतिरिक्त सावधानी अपनाइएको र सबै उडानहरू कडा निगरानीमा सञ्चालन भइरहेको भद्रपुर विमानस्थलले स्पष्ट पारेको छ ।

तपाइको प्रतिक्रिया
अन्तर्राष्ट्रिय विद्यार्थी दिवस: साहस र अधिकार सम्झाउने दिन
मंसिर ९ गतेदेखि आत्मानन्द गोल्डकप, ८ टिमको सहभागिता
इलामको टोड्केमा वार्षिक एक करोड २० लाखको टमाटर उत्पादन
प्रधानमन्त्री शाहको भारत भ्रमण राजकीय हुने तयारी
बाढीपछिको पुनर्निर्माणमा एडिबीको सहयोग बढाउन नेपालको आग्रह
युरोपबाट रुवान्डासम्म आप्रवासी निष्कासनको नयाँ अभ्यास, पाँच देशको संयुक्त योजना
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
© 2024 Muluki Khabar. All Rights Reserved. Design & Develop By: Indesign Media Pvt. Ltd.