
काठमाडौँ । हाल देशभर पश्चिमी वायुको प्रभावले मौसममा फेरबदल आएको छ। तराईका अधिकांश भू-भागमा बाक्लो हुस्सु र कुहिरो लागेको छ भने पहाडी तथा हिमाली क्षेत्रमा आंशिक बदली रहेको छ। बाँकी स्थानमा मौसम मुख्यतया सफा रहने जल तथा मौसम विज्ञान विभागले जनाएको छ।
कोशी, गण्डकी र कर्णाली प्रदेशका पहाडी भू-भागमा बदली हुनुका साथै कोशी प्रदेशका उच्च हिमाली क्षेत्रका एक-दुई स्थानमा हल्का वर्षा र हिमपातको सम्भावना छ। प्रतिकूल मौसमका कारण दैनिक जनजीवन, पर्यटन, स्वास्थ्य र सडक यातायातमा आंशिक प्रभाव पर्न सक्ने देखिएकाले सतर्कता अपनाउन अनुरोध गरिएको छ।

























