
काठमाडौँ । आगामी फागुन २१ गते हुन लागेको प्रतिनिधिसभा निर्वाचनका लागि परिचालन गरिने निर्वाचन प्रहरीको मापदण्ड गृह मन्त्रालयले स्वीकृत गरेको छ। गृह मन्त्रालयका प्रवक्ता सहसचिव आनन्द काफ्लेका अनुसार नेपाल प्रहरी र सशस्त्र प्रहरीले माग गरेको बजेटमा अर्थ मन्त्रालयले सहमति दिएसँगै गृहमन्त्री ओमप्रकाश अर्यालले निर्वाचन प्रहरीको मापदण्ड स्वीकृत गरेका हुन्।
स्वीकृत मापदण्ड अनुसार निर्वाचन प्रहरी ४० दिनका लागि भर्ना गरिनेछ। अर्थ मन्त्रालयले यसका लागि ७ अर्ब १३ करोड रुपैयाँ बजेटको स्रोत सुनिश्चित गरेको छ। सो बजेटका आधारमा करिब १ लाख ३४ हजार निर्वाचन प्रहरी भर्ना गर्ने प्रक्रिया सुरु गरिने प्रहरी प्रधान कार्यालयले जनाएको छ। निर्वाचन प्रहरी भर्ना प्रक्रिया सुरु गर्नका लागि प्रहरी प्रधान कार्यालयले छिट्टै दरखास्त आह्वान गर्ने तयारी गरेको छ।
निर्वाचन सुरक्षामा खटिने यी सुरक्षाकर्मीले प्रहरी जवान सरहको तलब र रासन सुविधा पाउनेछन्। यद्यपि, यसपटक निर्वाचन प्रहरीले छुट्टै भत्ता भने पाउने छैनन्। यसपटकको निर्वाचनमा सशस्त्र प्रहरीले पनि पहिलो पटक १५ हजार ११० जना निर्वाचन प्रहरी भर्ना गर्ने भएको छ। सशस्त्रले भर्ना गर्ने यी प्रहरीले पनि ४० दिन नै काम गर्नेछन् र सशस्त्र प्रहरी जवान सरहकै सेवा सुविधा प्राप्त गर्नेछन्।
नेपाल प्रहरीले सुरुमा १ लाख ३६ हजार ८११ जना निर्वाचन प्रहरीको अनुमति मागे पनि अर्थ मन्त्रालयले करिब ३ हजार सङ्ख्या घटाएर बजेट उपलब्ध गराएको हो। केन्द्रीय सुरक्षा समितिले यसअघि ३० कात्तिकमा १ लाख ३० हजार निर्वाचन प्रहरी भर्ना गर्ने निर्णय गरे पनि सुरक्षा चुनौतीलाई ध्यानमा राख्दै प्रहरी प्रधान कार्यालयले थप सङ्ख्या आवश्यक रहेको प्रस्ताव गृह मन्त्रालयमा पेस गरेको थियो।

























