
विराटनगर । मोरङको सुवनर्षीबाट तस्करीको अवैध मार्बलसहित एउटा ट्याक्टरलाई प्रहरीले बुधबार दिउँसो नियन्त्रणमा लिएको छ ।
सुनवर्षी नगरपालिका–५ झुँगी टोलस्थित भित्री सडक खण्डबाट को २ त ६४४२ नम्बरको ट्याक्टरमा लोड गरेर ल्याउँदै गरेको अवस्थामा मार्बल बरामद भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए । उनका अनुसार भारतबाट नेपालतर्फ अवैध रूपमा लुकाइछिपाइ ल्याउँदै गर्दा दिउँसो १ बजेतिर मार्बल बरामद भएको हो ।
तस्करी गरेर मार्बल ल्याइएको विशेष सूचनाका आधारमा इलाका प्रहरी कार्यालय रंगेलीका इन्सपेक्टर सन्तोषकुमार खड्का नेतृत्वको टोलीले ट्याक्टर नियन्त्रणमा लिएर खानतलासी गरेको थियो । त्यस क्रममा सनपाटले माथिबाट छोपेर ट्याक्टरमा लोड गरी मार्बल ल्याउँदै गरेको फेला परेको हो ।
डीएसपी बस्नेतका अनुसार ८५ वटा काटुनमा प्याक गरेर ल्याइएको ३ सय ४० पिस मार्बल र १६ मन (१ मनको ४० किलोग्राम) सनपाट बरामद भएको छ । मार्बल १ लाख ३६ हजार र सनपाट ६० हजार मूल्य बराबरको रहेको उनले बताए ।
ट्याक्टर चालक रंगेली नगरपालिका–६ का ६० वर्षीय रामनारायण सरदारलाई पनि पक्राउ गरिएको प्रहरीले जनाएको छ । ट्याक्टरमा भारतबाट भन्सार छली गरेर ल्याइएको अवैध मार्बल र सनपाट फेला परेपछि ट्याक्टरसहित चालकलाई नियन्त्रणमा लिइएको डीएसपी बस्नेतले बताए ।
नियन्त्रणमा लिइएको ट्याक्टर, बरामद गरिएको मार्बल र सनपाटसहित पक्राउ परेका चालकलाई आवश्यक अनुसन्धान एवं कारबाहीका लागि विराटनगर भन्सार कार्यालयमा बुझाउने तयारी प्रहरीले गरेको छ । ट्याक्टर र मार्बल कसको हो भन्ने खुलेको छैन ।

























