बार अध्यक्षविरुद्धको प्रतिवेदनको सुनुवाइ तत्काल नहुने

काठमाडौं । नेपाल बार एसोसिएसनका अध्यक्ष गोपालकृष्ण घिमिरेविरुद्धको प्रतिवेदनको सुनुवाइ तत्काल नहुने भएको छ । सुनुवाइ दसैंपछि हुने जनाइएको छ ।

सर्वोच्च अदालतले सोमबार अपरान्ह घिमिरेविरुद्ध अदालतको अवहेलनासम्बन्धी प्रतिवेदन तयार पारेको थियो । सुनुवाइ तत्काल नहुने र दसैंपछि हुने भएको हो । त्यतिबेलासम्म प्रधान न्यायाधीश विश्वम्भरप्रसाद श्रेष्ठले अवकाश पाइसक्ने छन् ।

Advertisement

सर्वोच्चका उपरजिष्ट्रार गोविन्द घिमिरेले पेस गरेको प्रतिवेदनमाथि सर्वोच्च प्रशासनले कात्तिक १ गते तारेख तोकेको छ । त्यो दिन इजलासमा प्रतिवेदन पेस हुन्छ कि हुँदैन भनेर यकिन छैन ।

प्रधान न्यायाधीशले अवकाशको बेलामा लेनदेनबाट न्यायाधीश नियुक्त गरेको आरोपसहितको अभिव्यक्ति गत शुक्रबार बार अध्यक्ष घिमिरेले दिएका थिए । उक्त अभिव्यक्तिले अदालतको अवहेलना हुने दाबी गर्दै घिमिरेलाई कारबाही हुनुपर्ने भनी सर्वोच्च प्रशासनले प्रतिवेदन तयार पारेको थियो ।

सर्वोच्च अदालतको पूर्ण बैठकमा बार अध्यक्ष घिमिरेको अभिव्यक्तिबारे सोमबार छलफल समेत भएको बताइएको छ । सर्वोच्च अदालतले अवहेलनाको कारबाही अघि बढाएपछि बारले सोमबार नै पदाधिकारीहरुसँग अनौपचारिक छलफल गरेको थियो ।

बार अध्यक्ष घिमिरेले भने आफूले प्रधान न्यायाधीशविरुद्ध नभइ न्यायाधीश नियुक्त गर्ने निकाय न्याय परिषद्का अध्यक्षविरुद्ध अभिव्यक्ति दिएको बताउँदै आएका छन् । न्यायसम्पादन गर्ने प्रधान न्यायाधीशलाई नभइ आफूले न्यायाधीशको नाम सिफारिस गर्ने न्याय परिषद् अध्यक्षमाथि प्रश्न गरेको घिमिरेको भनाइ छ ।

उनले न्याय परिषद् अध्यक्षमाथि प्रश्न गर्दा अदालतको अवहेलना नहुने जिकिर गरेका छन् । न्याय परिषद्को अध्यक्ष प्रधान न्यायाधीश हुन्छन् ।