सर्वोच्चको न्यायाधीशमा निरौला र पाण्डे अनुमोदित

काठमाडौं । सर्वोच्च अदालतको न्यायाधीशमा नृपध्वज निरौला र नित्यानन्द पाण्डे अनुमोदित भएका छन् ।

संसदीय सुनुवाइ समितिले शुक्रबार दुवै जनाको नाम सर्वसम्मत अनुमोदन गरेको हो । प्रधान न्यायाधीशको नेतृत्वमा रहने न्याय परिषद्को असोज ११ गते बसेको बैठकले सर्वोच्चको न्यायाधीशमा निरौला र पाण्डेको नाम सिफारिस गरेको थियो ।

संसदीय सुनुवाइ समितिबाट अनुमोदित भइसकेका कारण दुवै जना सर्वोच्चको न्यायाधीश हुन योग्य ठहरिएका छन् । अब राष्ट्रपति रामचन्द्र पौडेलबाट उनीहरुले नियुक्ति लिने छन् । त्यसपछि पदमा बहाल हुने छन् ।

निरौला २०९३ साल माघ २५ गतेसम्म सर्वोच्चको न्यायाधीश रहने छन् । त्यसपछि करिब २ महिना प्रधान न्यायाधीश बन्ने छन् ।

पाण्डे २०८७ फागुन १४ गतेसम्म सर्वोच्चको न्यायाधीश रहने छन् । त्यसपछि ६५ बर्से उमेर हदका कारण उनी अवकाशमा जाने छन् ।

अहिले ६ जना न्यायाधीशको पद रिक्त रहेकोमा संसदीय सुनुवाइ समितिको अनुमोदनपछि सर्वोच्च अदालतमा दुई न्यायाधीशको पदपूर्ति हुने भएको छ । सर्वोच्च अदालतमा अझै चार जना न्यायाधीशको पदपूर्ति हुन बाँकी रहने छ ।

शुक्रबार सुनुवाइका क्रममा सांसदहरूले सोधेका विभिन्न प्रश्नको उत्तर प्रस्तावित न्यायाधीशहरूले दिएका थिए । सर्वोच्चको न्यायाधीश सिफारिस हुनुअघि निरौला उच्च अदालत पाटनका मुख्य न्यायाधीश र पाण्डे उच्च अदालत तुलसीपुरका मुख्य न्यायाधीश थिए ।

सुनुवाइ समितिमा निरौलाविरुद्ध दुईवटा उजुरी परेका थिए । पाण्डेविरुद्ध कुनै उजुरी परेको थिएन।