
विराटनगर । मोरङको सुनवर्षी नगरपालिका– ८ को सिक्टी क्षेत्रमा मुश्लिम समुदायको इजतेमा सुरु भएको छ । सोमबारबाट सुरु भएको इजतेमामा २२ हजार भन्दा बढी सहभागी छन् ।
इजतेमा तीन दिनसम्म चल्ने नेपाल मुश्लिम संघका केन्द्रिय सचिव अफजल हुसैन गुल्जारले जानकारी दिए । सचिव हुसैनका अनुसार मुश्लिम धर्म अनुसार इजतेमामा हजारौंको संख्यामा उपस्थित भएका अनुयायीलाई धर्म गुरुले प्रवचन दिनेछन् । ‘सोमबारबाट सुरु भएको कार्यक्रम तीनदिनसम्म चल्नेछ, उनले भने,’ बुधबार दुवा गरेर कार्यक्रमको समापन हुनेछ । स्वदेश र विदेश भारतबाटसमेत आएका धर्म गुरुले प्रवचन दिनेछन् ।’
कार्यक्रम दुई महिना अघि नै तय भइसकेको र स्थानीय समुदायको समन्वयका कारण सहज भएको माेरङका प्रमुख जिल्ला अधिकारी इन्द्रदेव यादवले जानकारी दिए । उनका अनुसार स्थानीय मुश्लिम समिति र सुरक्षा निकायबीच समन्वय भइरहेको छ । भारतबाहेक अन्य मुलुकबाट नागरिकलाई प्रवेशमा रोक लगाएकाे उनले बताए ।
सीमामा कुकुरको सहयोगसँगै सुरक्षा निकायले भारतीय नागरिकको आधार कार्ड हेर्ने, मेटल डिटेक्टरले जाँच गर्ने काम हुँदै आएको प्रजिअ यादवले जानकारी दिए ।
‘विगत दुई महिना अघि आयोजकले ठूलो खेतमा शौचालयदेखि अन्य संरचना बनाउनु भएको रहेछ। अर्कोस्थान सार्दा समय र समस्या हुने देखिएको थियो, उनले भने,’भारतबाहेक अन्य क्षेत्रबाट नागरिक प्रवेश गर्न नपाउने समन्वय भएको छ । यस्तो हुदाँ हामी तत्कालै उहाँहरुलाई सीमाबाटै भारततर्फ नै पठाउने छौ ।’
इजतेमाकाे सुरक्षाका लागि नेपाल प्रहरीबाट ४ सय २५ र सशस्त्र प्रहरी बलबाट १ सय २५ गरि कुल ५ सय ५० जना सुरक्षाकर्मी खटिएका छन् ।
कार्यक्रमस्थल भारतीय सीमाबाट करिब अढाई किलोमिटरको दुरीमा छ । यसअघि, गृहमन्त्रालयले नै सुरक्षा अवस्थालाई मध्यनजर गर्दै कार्यक्रम गर्नका लागि अनुमति नदिएको स्थानीय आयोजक समितिका एक सदस्यले जानकारी दिए ।
सीमाको १० किलोमिटर बाहिर कार्यक्रम हुनुपर्ने, विदेशी नागरिकलाई प्रवेश गराउन नपाउने र सुरक्षाको लागि स्थानीयले समन्वय गर्नुपर्ने प्रावधान राखेको थियो । यद्धपी, जिल्ला प्रशासन कार्यालय मोरङमा छलफल गरि कार्यक्रमलाई व्यवस्थित र सुरक्षित गराउने प्रतिवद्धताका साथ काम अघि बढेको थियाे ।

























