
पोखरा । बेलुन पड्किएर आगोको लप्काले लाग्दा अर्थमन्त्री विष्णु पौडेल र पोखरा महानगरपालिका मेयर धनराज आचार्य घाइते भएका छन् ।
पोखरा भ्रमण वर्ष २०२५ को उद्घाटन गर्ने क्रममा शनिबार बेलुन पड्किएर दुर्घटना भएको हो । बेलुन उडाउने क्रममा पड्किएर उनीहरु घाइते भएका हुन् ।
आगोको लप्काले लागेर घाइते भएका दुवै जनाको उपचार भइरहेको र अवस्था सामान्य रहेको जनाइएको छ । अर्थमन्त्री पौडेलको गण्डकी अस्पतालमा प्रारम्भिक उपचार भइरहेको छ ।
उनको स्वास्थ्यमा केही असर परेकाले आजै काठमाडौं जाने तयारी रहेको बताइएको छ । घटनापछि पर्यटनमन्त्री बद्री पाण्डे र गण्डकीका मुख्यमन्त्री सुरेन्द्रराज पाण्डेको उपस्थितिमा कार्यक्रम भएको थियो ।
पोखरामा २० लाख पर्यटक भित्र्याउने लक्ष्यसहित पोखरा महानगरले पर्यटन वर्ष मनाउँदै छ ।

























