
विराटनगर । झापामा आगलागी हुँदा ठूलो क्षति भएको छ । कचनकवल गाउँपालिका–६ बनियानीका कमल खतिवडाको घरमा शनिबार साँझ आगलागी भएको हो ।
पुजा कोठाबाट बालेको दियोबाट साँझ ७ः३५ बजेतिर सल्किएको आगोले टिनको छानो लगाइएको २ तले र १० कोठे घर पूर्णरूपले जलेर ध्वस्त भएको प्रहरीले जनाएको छ । प्रहरीका अनुसार आगोले घरसहित घरभित्र रहेको १ लाख रूपैयाँ नगद, अन्दाजी ४१ लाख ४२ हजार ५ सय रूपैयाँ बराबरको सुन, ७५ तोला चाँदी, २ वटा एसी, २ वटा टिभी र १० लाख मूल्य बराबरको विभिन्न सामान जलेर ध्वस्त भएको छ ।
घटनामा ७० लाख बराबरको क्षति भएको प्रहरीको प्रारम्भिक अनुमान छ । स्थानीय र दमकलको सहयोगमा नेपाल तथा सशस्त्र प्रहरीको राति १० बजेतिर आगो नियन्त्रणमा लिएका थिए । घटनामा मानवीय र चौपाया क्षति भने नभएको प्रहरीको भनाइ छ ।

























