
विराटनगर। खोटाङमा रहेको त्रिधार्मिकस्थल हलेसी बजारमा आइतबार साँझ भएको आगलागी करिब चार ४ घण्टापछि निभाइएको छ। आगलागीबाट सात करोड रुपैयाँ बराबरको धनमाल क्षति भएको अनुमान गरिएको छ।
हलेसी तुवाचुङ नगरपालिका–७ महादेवस्थानस्थित हलेसी बजारका पदम राईको भान्छा कोठाको ग्यास सिलिन्डरबाट साँझ ६ बजेतिर सुरु भएको आगो स्थानीय र सुरक्षाकर्मीको प्रयासमा राति करिब ११ बजे निभाइएको थियो।
आगलागीबाट राईको घर तथा घरमा सञ्चालित हार्डवेयर पसल, निर्धन उत्थान लघुवित्तको कार्यालय, आइराज राई र प्रकाशचन्द्र गिरीको घरमा क्षति पुगेको प्रहरीले जनाएको छ।
सुक्खाग्रस्त क्षेत्र हलेसीमा भएको आगो निभाउन पानी अभाव भएकाले समस्या भएको इलाका प्रहरी कार्यालय हलेसीका प्रहरी निरीक्षक हेमन्त राईले जानकारी दिए। आगो निभाउन जिल्ला सदरमुकामबाट तीनवटै सुरक्षा निकायका टोली हलेसी पुगेको थियो।

























