
काठमाडौं । भारतको ओडिसास्थित कलिंगा इन्स्टिच्यूट अफ् इन्डस्ट्रियल टेक्नोलोजी (केआईआईटी)मा मृत भेटिएकी प्रकृति लम्सालका बुबा सुनील लम्सालले आफूहरुलाई न्याय दिनुपर्ने माग गरेका छन् ।
ओडिसा पुगेर प्रहरी अधिकारीहरुसँग भेट गर्दै उनले न्याय माग गरेका हुन् । भारतमै रहेका प्रकृतिका दाइ सिद्धान्तले घटनाबारे छानबिन गर्न माग गर्दै प्रहरीमा हिजो (सोमबार) बिहानै जाहेरी दिइसकेका छन् ।
भारतको समाचार एजेन्जी ‘एएनआई’सँग कुरा गर्दै प्रकृतिका बुवा सुनीलले छोरीमाथि ‘ह्यारेसमेन्ट र ब्ल्याकमेलिङ’ भएको कारणले आत्महत्या गर्ने अवस्था भएको भन्दै न्याय पाउनुपर्ने माग गरे । ‘हाम्रो माग न्याय पाउनुपर्यो भन्ने हो । अरु केही होइन’, प्रकृतिका बुवाले भने, ‘विद्यार्थीलाई पहिले आवश्यक परेका बेला बोलाउने । अहिले यस्तो भयो जाउ भन्ने चाहिँ ठिक होइन ।’
कलेजले नेपाली विद्यार्थीमाथि गरेको दमनको उनले विरोधसमेत गरे । यसैबीच, प्रकृतिले प्रयोग गर्ने मोबाइल, ल्यापटप, डायरी लगायत सामग्री प्रहरी अनुसन्धान टोलीमार्फत् फरेन्सिक ल्याबमा परीक्षणका लागि लगिएको जनाइएको छ ।
२० वर्षीया प्रकृति आइतबार अपराह्न होस्टलको कोठामा मृत अवस्थामा फेला परेकी थिइन् । त्यही दिन साँझबाट विद्यार्थीहरुले न्यायको माग गर्दै प्रदर्शन गर्दै आएका छन् ।
युनिभर्सिटी प्रशासनले प्रदर्शन गरेका विद्यार्थीहरुमाथि दमन गरेको थियो । यसको नेपाल र भारतका विभिन्न स्थानमा विरोध भइरहेको छ ।

























