प्लाईउड निर्यातमा भारतको अवरोध, काँकडभिट्टाबाट गएका ट्रक २ सातादेखि अलपत्र

Share this
664shares
मुलुकी खबर
मुलुकी खबर
clock२०८१ चैत १३, बुधबार ०९:३०

विराटनगर । भारतले ब्युरो अफ इन्डियन सर्टिफिकेट (बीआईएस)को बखेडा झिकेर प्लाईउड निर्यातमा अवरोध खडा गरेको छ ।

बीआईएस भारत सरकारको गुणस्तर प्रमाणपत्र हो । त्यो प्रमाणपत्र नभएको भन्दै नेपालबाट प्लाईउड निर्यातमा भारतले अवरोध गरेको हो । प्लाईउड नेपालबाट भारत निर्यात हुने प्रमुख वस्तुमध्येमा पर्छ ।

भारतले अवरोध गरेपछि प्लाईउड लोड गरेर पूर्वी नाका काकाँडभिट्टा हुँदै भारत गएका ३४ वटा ट्रक २ सातादेखि बाटैमा रोकिएका छन् । काँकडभिट्टासहित मुलुकका विभिन्न नाकाबाट प्लाईउड निर्यातमा भारतले अवरोध गरिरहेको व्यवसायीहरु बताउँछन् ।

मेची उद्योग वाणिज्य संघका अध्यक्ष खेम प्रसाईंका अनुसार काँकडभिट्टा हुँदै भारत गएका ३४ वटा ट्रकलाई पानीट्यांकीस्थित रानीगञ्ज भन्सार कार्यालयले रोकेको छ । २ साताअघि पानीट्यांकी पुगेका ट्रकलाई बीआईएस नभएको भन्दै भारतले निर्यातमा रोक लगाएको उनको भनाइ छ । भारतले अघि बढ्न नदिएपछि प्लाईउड लोड गरिएका ट्रक अलपत्र अवस्थामा रहेको जानकारी प्रसाईंले दिए ।

भारतले आयात हुने सामानमा बीआईएस प्रमाणित हुनुपर्ने नयाँ नियम लगाएको छ । नेपालबाट निर्यात हुने वस्तुमा रोक लगाउनकै लागि भारतले नयाँ नियम लगाएको व्यवसायीहरुको बुझाइ छ । उनीहरुका अनुसार यसअघि बीआईएस बिना नै प्लाईउड निर्यात हुँदै आएको थियो ।

प्रसाईंका अनुसार प्याईउड बोकेका ट्रक भारतीय भन्सारले लामो समयदेखि रोकेर राखेको भए पनि अवस्था सहज बनाउन कसैले भूमिका खेलेको छैन । भारतले जान दिएको छैन । स्वदेश फर्काउने अवस्था पनि नभएको उनको भनाइ छ ।

व्यवसायीहरुका अनुसार नेपालमा ८० वटा प्लाईउड उद्योग छन् । एउटा उद्योगका लागि कम्तीमा २५ करोड रूपैयाँ लाग्ने गरेको छ । आर्थिक वर्ष २०८०–०८१ मा नेपालबाट ७ अर्ब ४३ करोड मूल्य बराबरको प्लाईउड भारत निर्यात भएको थियो ।

प्लाईउड नेपाली कच्चा पदार्थमा आधारित र व्यापार घाटा न्यूनीकरणमा महत्त्वपूर्ण योगदान पुर्याउने निर्यात वस्तु हो । तर, निर्वाध रूपमा भइरहेको निर्यातमा भारतले रोक लगाएपछि समस्या भएको छ । नेपाल सरकारले भारत सरकारसँग उच्चस्तरीय सहमति गरेर निर्यातको वातावरण बनाउनुपर्ने माग व्यवसायीहरुको छ ।

तपाइको प्रतिक्रिया
गौरको कानुपट्टी सीमा क्षेत्रबाट ९ एमएमका २७ थान गोली बरामद
कार्कीको रिटमा सर्वोच्चमा प्रारम्भिक सुनुवाइ हुँदै
राष्ट्रिय आविष्कार केन्द्रबाट कम्प्युटर चोरी, सीसीटीभीमा कैद भयो घटना
पाँच स्थानीय तह भूमिसम्बन्धी समस्यामुक्त घोषणा
रुसमा सैन्य कार्गो विमान दुर्घटना, चालक दलसहित १९ जनाको मृत्यु
एनपिएलमा अनलाइन सट्टेबाजी गरेको आरोपमा भारतीय नागरिक पक्राउ  
विराटनगरलाई लजिस्टिक हब बनाउन कार्गो रेल सञ्चालनमा जोड
मोरङ र उदयपुरमा दुर्घटना : तीन जना घाइते, दुईको अवस्था गम्भीर
स्थानीय चुनावको तयारीमा एमाले, बुधबारदेखि राष्ट्रिय भेला
विराटनगरमा कराँते छनोटका क्रममा खेलाडी घाइते
© 2024 Muluki Khabar. All Rights Reserved. Design & Develop By: Indesign Media Pvt. Ltd.