
विराटनगर । लागुऔषधसहित कोशीका तीन जिल्लाबाट ८ जना पक्राउ परेका छन्। प्रहरीका अनुसार मोरङ, झापा र सुनसरीबाट उनीहरु पक्राउ परेका हुन् ।
विराटनगर महानगरपालिका–१५ बाट लागूऔषध नियन्त्रण ब्युरोको टोलीले मोरङको बेलबारी नगरपालिका–८ का २८ वर्षीय मिलन थापा र ३९ वर्षीय केशरकुमार मगरलाई पक्राउ गरेको हो ।
यस्तै, झापाको गौरादह नगरपालिका–४ का २३ वर्षीय उमेश गिरीलाई ब्राउन सुगरसहित पक्राउ गरिएको हो । उक्त पदार्थ बेच्ने स्थानीय २४ वर्षीय मनोज भारती पनि पक्राउ परेका छन् ।
मोरङको केराबारी गाउँपालिका–१० का ३१ वर्षीय तेजबहादुर तामाङ र केराबारी–७ की २७ वर्षीया फुलमाया लिम्बुलाई प्रहरीले १.८८ ग्राम ब्राउन सुगरसहित पक्राउ गरेको प्रहरीले जनाएको छ ।
उता, सुनसरीको लौकहीमा मकवानपुरको हेटौंडा–११ का ३२ वर्षीय राजेश लामा र २१ वर्षीय समिर क्षेत्र पक्राउ परेका छन् । उनीहरुको साथबाट पनि प्रहरीले १.४७ ग्राम ब्राउन सुगर बरामद गरेको छ ।
पक्राउ परेकाहरुमाथि थप अनुसन्धान र कारबाही अघि बढाइएको विराटनगरस्थित कोशी प्रदेश प्रहरी कार्यालयले जानकारी दिएको छ ।

























