
विराटनगर । विराटनगरमा जारी चौथो मिल्स कप इण्डो–नेपाल टी २० क्रिकेट प्रतियोगिताको सेमिफाइनलमा विराटनगरको होराइजन क्रिकेट क्लब र सिद्धार्थ स्पोर्टिङ क्लब (एनबीएससी) पुगेको छ ।
प्रतियोगिताअन्तर्गत मंगलबार भएको पहिलो खेलमा होराइजनले आयोजक मिल्स क्रिकेट क्लबलाई ४५ रनले हराउँदै सेमिफाइनल यात्रा तय गरेको हो ।
टस जितेर पहिले ब्याटिङ थालेको होराइजनले निर्धारित २० ओभरमा अलआउट हुँदै १ सय ४२ रनको चुनौती प्रस्तुत गर्यो । सन्तोष कार्कीले ३८ रन, कपिल मण्डलले २७ रन, अमन अलीले २३ रन, निरज मुखियाले १६ रन र अभिषेक कार्कीले १३ रन बनाए ।
बलिङमा आयोजकका मुरली चौधरीले ४ विकेट लिए भने प्रशान्त साह र अमर यादवले समान २–२ विकेट लिए ।
१ सय ४३ रनको लक्ष्य पछ्याएको आयोजकले १५ ओभरमा सबै विकेट गुमाउँदै ९७ रनमै समेटियो । सार्थक धितालले २५ रन, राहुल बिकले २४ रन, सन्तोष चौधरीले २१ रन र पपु यादवले ११ रन बनाए ।
बलिङमा होराइजनका दीपेश कँडेलले ४ विकेट, प्रेम कामतले २ विकेट तथा फिरदोस अन्सारी र अभिषेक कार्कीले समान १–१ विकेट लिए । खेलको प्लेयर अफ द म्याच दीपेश कँडेलले ३ हजार रुपैयाँ प्राप्त गरे ।
बिहीबार होराइजनले फाइनल यात्राका लागि पटनाको हाइपर क्रिकेट क्लबसँग खेल्ने छ ।
त्यसैगरी, आजै भएको दोस्रो खेलमा एनबीएससीले भारतको सुपाैल क्रिकेट क्लब (मुन) लाई ६ विकेटले हराउँदै सेमिफाइनलमा स्थान पक्का गरेको छ ।
टस जितेर ब्याटिङ थालेको सुपाैलले २० ओभर पूरै खेल्दै ९ विकेटको क्षतिमा १ सय ३१ रन बनाएको थियो । कमलुद्रिनले २५ रन, प्रेम कुमारले २४ रन र रिसु कुमारले २० रन बनाए ।
बलिङतर्फ एनबीएससीका नितेश यादवले ३ विकेट लिए भने सुवर्ण यादव, पप्पु यादव, सुमित श्रेष्ठ र सुवास रोयले समान १–१ विकेट लिए ।
१ सय ३२ रनको लक्ष्य पछ्याउँदै एनबीएससीले १४ ओभर १ बलमा ४ विकेटको क्षतिमा विजयी भयो । पप्पु यादव (बी) ले ५२ रन, रोशनले ३२ रन र अविनाश करनले २० रन बनाए ।
बलिङमा सुपौलका गुलसन राजले २ विकेट र प्रेम कुमारले १ विकेट लिए । खेलको प्लेयर अफ द म्याच पप्पु यादव (बी) ले ३ हजार रुपैयाँ प्राप्त गरे ।
प्रतियोगिताअन्तर्गत बुधबार विराटनगरको वाइआरसिसी र सिराहा क्रिकेट क्लबबीच खेल हुनेछ ।



















