
विराटनगर । विराटनगरमा ६ दिनयता लगातार मोटरसाइकल चोरीका घटना भएका छन् । यो अवधिमा ६ वटा मोटरसाइकल चोरी भएको छ । मोरङ प्रहरीका अनुसार कोशी अस्पताल आसपासबाट तीन वटा मोटरसाइकल चोरी भएको छ ।
मोटरसाइकल चोरीमा संलग्न भएको आरोपमा प्रहरीले २ जनालाई पक्राउ गरेको छ । पक्राउ परेकामध्ये १ जना १८ वर्षभन्दा कम उमेरका छन् ।
मंगलबार दिउँसो कोशी अस्पताल परिसरबाट हराएको प्र १–०२–०४१ प ३४० नम्बरको मोटरसाइकल खोज्ने क्रममा प्रहरीले नेपाल भारत सीमा क्षेत्रबाट विराटनगर–१७ का २५ वर्षीय महम्मद मियाँ र १७ वर्षीय बालकलाई पक्राउ गरेको हो ।
चोरीको मोटरसाइकल भारत पुर्याएर फर्किएका उनीहरुले रानीमा अर्काे मोटरसाइकल चोरी गर्दै गर्दा जिल्ला प्रहरी कार्यालयबाट प्रहरी निरीक्षक सरोज खनाल र इलाका प्रहरी रानीबाट प्रहरी निरीक्षक प्रकाश थापाको टोलीले पक्राउ गरेको हो । प्रहरीले चोरी भएका मोटरसाइकलको विवरण खुलाएको छैन ।
यो समूहले चोरी गरेको मोटरसाइकल भारतमा लगेर बेच्ने गरेको थियो । समूहमा अरु पनि हुन सक्ने बताउँदै प्रहरीले खोजी तीब्र बनाएको छ । प्रहरीका अनुसार चोरी भएका ६ वटा मोटरसाइकलमध्ये एउटा मोटरसाइकल फेला परेको छ ।

























