
काठमाडौं । मोटरसाइकलको ट्यांकीभित्र राखेर लागुऔषध गाँजा तस्करी गर्ने रौतहटका युवकलाई प्रहरीले पक्राउ गरेको छ । सीमा नजिक रहेको भारतको बिहार पूर्वी चम्पारण झरौखर थाना क्षेत्रमा उनलाई मंगलबार बेलुका पक्राउ गरिएको हो ।
मोटरसाइकलको ट्यांकीभित्र ४ किलोभन्दा बढी गाँजासहित स्थानीय बौधिमाई नगरपालिका–३ मटिअर्वाका मुकेश साहलाई पक्राउ गरिएको सीमा सुरक्षा बल एसएसबी क्याम्प जमुनियाका प्रमुख सहायक कमान्डेन्ट भाग सिंह गुर्जरले जानकारी दिएका छन् ।
साह प्रदेश २–०३–००७ प १७६७ नम्बरको मोटरसाइकल चढेर भारतीय क्षेत्रमा प्रवेश गरेका थिए । त्यस क्षेत्रमा रहेको झरौखर थानाका गस्ती टोली र एसएसबी क्याम्प जमुनियाको टोलीले मोटरसाइकल रोकेर जाँच गरेको थियो ।
त्यस क्रममा मोटरसाइकलको ट्यांकीभित्र ४ किलो ३०० ग्राम गाँजा राखेको भेटिएको थियो । पक्राउ परेका साहले यसअघि पनि यसरी नै नेपालबाट भारतीय क्षेत्रमा तस्करीमार्फत गाँजा पुर्याएको प्रहरीसमक्ष स्वीकारेका छन् ।

























