
विराटनगर । कोसी प्रदेश खेलकुद विकास बोर्डले ७ औँ अन्तर्राष्ट्रिय जुडो च्याम्पियनसिपमा सहभागी हुने प्रदेशका खेलाडीहरूलाई बिदाइ गरेको छ ।
राष्ट्रिय जुडो संघले वैशाख ३ देखि ५ गतेसम्म काठमाण्डौंमा आयोजना गरेको प्रतियोगितामा प्रदेशबाट भाग लिन जाने खेलाडी र प्रशिक्षकलाई शनिबार बोर्डले एक कार्यक्रमका बीच बिदाइ गरेको हो ।
खेलाडी बिदाइ कार्यक्रममा बोल्दै बोर्डका सदस्यसचिव कृष्ण बस्नेत ( पर्शुराम ) ले खेलाडीहरूलाई प्रतियोगितामा उत्कृष्ट प्रदर्शन गर्दै पदक जितेर आउन शुभकामना दिए ।
उनले राष्ट्रिय स्तरको प्रतियोगिताका विजेताहरूलाई बोर्डले नगदसहित सम्मान गर्ने गरेको स्मरण गर्दै प्रतियोगिताका विजेतालाई समेत बोर्डले उचित मूल्याङ्कन गर्ने बताए ।
बोर्डका कार्यालय प्रमुख कालिदास भट्टराईले प्रतियोगितामा विभिन्न वजन समूहको स्पर्धामा कोसी प्रदेशबाट २५ जना खेलाडी र ३ जना प्रशिक्षकको सहभागिता रहने जानकारी दिए ।



















