
ललितपुर । ललितपुर महानगरपालिका–१२ मंगलबजारमा लागुऔषध सेवन गरेर १५ वर्षीय बालकले आफ्नै ११ वर्षीया बहिनीको हत्या गरेको घटना बाहिर आएको छ ।
मंगलबजार खपिनछेँ टोलको एउटा घरमा चैत २९ गते ११ वर्षीया बालिकाको शव घरको पानी ट्यांकीभित्र सडेगलेको अवस्थामा फेला परेको थियो । बालिकाको हत्या चैत ४ गते भएको प्रहरीको अनुसन्धानबाट खुलेको छ ।
बालिकाको हत्या आरोपमा उनकै १५ वर्षीय दाइ पक्राउ परेका छन् । काठमाडौं उपत्यका अपराध अनुसन्धान कार्यालयका एसपी अंगुर जीसीका अनुसार बहिनीको हत्यामा संलग्न भएको पत्ता लागेपछि १५ वर्षीय बालकलाई पक्राउ गरिएको हो ।
मंगलबजारमा डेरा बस्ने १ महिलाले ११ वर्षीया छोरी चैत ४ गते राति ९ बजेबाट सम्पर्कविहीन बनेको भनेर जिल्ला प्रहरी परिसर ललितपुरमा निवेदन दिएकी थिइन् । खोतलासमा क्रममा चैत २९ गते बाबुराजा अवालेको पुरानो घरको भुइँ तलामा रहेको पानी ट्याङकीमा सडेगलेको अवस्थामा बालिकाको शव फेला परेको थियो ।
प्रहरीले अनुसन्धान गर्ने क्रममा बालिकाको हत्या आफ्नै दाइबाट भएको पत्ता लागेको हो । बहिनीको हत्यामा संलग्न बालकलाई प्रहरीले मंगलबजारबाट नियन्त्रणमा लिएर थप अनुसन्धान अघि बढाएको छ । बझाङको सुर्मा गाउँपालिका–४ घर भएका परिवारकी ११ वर्षीया छोरी ललितपुर–१२ मंगलबजारबाट हराएकी थिइन् ।
बालिकाको शव बाबुराजा अवालेको ५ तल्ले घरको भुइँ तल्लामा रहेको प्रयोगविहीन सिमेन्टले बनाएको पानी ट्यांकीमा फेला परेको थियो । बाबुराजा अवालेको उक्त घरमा मृतकका अभिभावक भाडामा बस्थे ।
उनीहरु फागुन २५ गते त्यो घर छोडेर अन्यत्र डेरा सरेका थिए । उनीहरुले छोडेर गएपछि कोठा खाली भएको थियो । कोठा खाली भएपछि चमेली सुनारको परिवार त्यहाँ कोठा खोज्न पुगेका थिए । खाली कोठामा उनीहरु बस्ने तयारी गरेको थियो ।
तर, उनीहरुले कोठा सरेकै दिन अनौठो गन्ध आएपछि खानेपानीको ट्याङकी खोलेर हेर्दा बालिकाको शव देखेर प्रहरीलाई खबर गरेका थिए । चैत ४ गते मृतक बालिका र उनको दाजु पहिला डेरामा बस्ने गरेको अवालेको घरतर्फ जाँदै गरेको सीसीटीभी फुटेजमा देखिएको छ ।
दाजु बहिनीसँगै गएको फुटेज भेटिए पछि दाजुमाथि शंका लागि सोधपुछ गर्दा बालकले कोठा सर्दा छुटेका कपडाहरु लिन भनेर बहिनीसँग गएको बताए । सामान्य विवाद हुँदा बहिनीलाई पिटेर नाइलनको डोरीले घाँटी खसेपछि भुइँमा लडाई छाडेर हिँडेको ती बालकले प्रहरीलाई बताए ।
अनुसन्धानका क्रममा दाजुले लागुऔषध सेवन गरेर बहिनीको हत्या गरेको पत्ता लागेको छ । ती बालकले पनि लागुऔषधको नशामा आफू भएकाले त्यस्तो घटना हुन गएको बयान प्रहरीलाई दिएका छन् ।
प्रहरीका अनुसार डोरीले घाँटी कसेर बहिनीलाई लडाएपछि हिँडेका १५ वर्षीय बालक भोलिपल्ट फर्किएर घटनास्थल पुगे । बहिनीको मृत्यु भइसकेको देखेपछि शवलाई पानी ट्यांकीमा छोपेर हिँडेको उनले प्रहरीलाई बताएका छन् ।

























