
काठमाडौं । राष्ट्रिय वाणिज्य बैंकले आज (आइतबार)देखि ऋणपत्र विक्री गर्दै छ । २ अर्ब ५० करोड बराबरको ऋणपत्र विक्री गर्ने बैंकको तयारी छ ।
नेपाल धितोपत्र बोर्डबाट ७ वर्ष अवधिसहित कूल २५ लाख कित्ता ऋणपत्र निष्कासन गर्ने गरी बैंकले स्वीकृति पाएको छ । ऋणपत्रमा लगानी गर्नेले वार्षिक रुपमा ७ प्रतिशत बराबर ब्याजदर प्राप्त गर्नेछन् ।
अंकित मूल्य १ हजार दरको ऋणपत्रमा लगानीकर्ताले कूल २५ कित्तादेखि विक्री गर्न लागिएको सम्पूर्ण कित्तामा नै आवेदन दिन सक्नेछन् । धितोपत्र विक्री प्रबन्धक सानिमा क्यापिटल रहेको सो ऋणपत्र छिटोमा यही वैशाख १० गते र ढिलोमा वैशाख २१ गतेसम्म रहने जनाइएको छ ।
२ अर्ब ५० करोड बराबरको कूल निष्कासनमध्ये ६० प्रतिशतले हुन आउने १ अर्ब ५० करोड मूल्य बराबरको १५ लाख कित्ता व्यक्तिगत प्रयोजनका लागि छुट्याइएको छ । ४० प्रतिशतले हुने १ अर्ब बराबरको १० लाख कित्ता भने सर्वसाधारणका लागि निष्कासन हुने वाणिज्य बैंकले जनाएको छ ।
त्यसमा ५० हजार कित्ता सामूहिक लगानी कोषका लागि छुट्याइएको छ । कूल ९ लाख ५० हजार कित्तामा भने सर्वसाधारणले लगानी गर्न पाउने व्यवस्था गरिएको छ ।
बैंकलाई केयर रेटिङ नेपालको ‘केयर एनपी ए प्लस’ रेटिङ प्रदान गरिएको छ । बैैंकको अधिकृत पुँजी ३० अर्ब तथा जारी पुँजी १५ अर्ब ६३ करोड ७३ लाख ७७ हजार र चुक्ता पुँजी १५ अर्ब ६३ करोड ७३ लाख ७७ हजार बराबर छ ।

























