
विराटनगर । मोरङको कानेपोखरी गाउँपालिकामा १० औं सीएच आईटीएफ तेक्वान्दो च्याम्पियनसिप हुने भएको छ ।
नेपाल सीएच आईटीएफ तेक्वान्दो कोशी प्रदेशको आयोजना आगामी जेठ १५, १६ र १७ गते प्रतियोगिता हुने भएको हो । आयोजकले शनिबार पत्रकार सम्मेलनको आयोजना गरेर प्रतियोगिता कानेपोखरी–६ स्थित जनसेवा माविको खेलमैदानमा हुने जानकारी दिएको छ ।
प्रतियोगितामा २५ जिल्लाबाट ३ सय ५० जना खेलाडी सहभागी हुने जनाइएको छ । ५० जना रेफ्री, १० जना जुरी, १० जना अफिसियल तथा ३० जना राष्ट्रिय तथा अन्तर्राष्ट्रिय निर्णायक रहने छन् ।
पुरुष र महिला दुवैतर्फ सिंगल फाइट, ग्रुप फाइट, सिंगल प्याटन र ग्रुप प्याटन विधामा प्रतिस्पर्धा हुनेछ । पुरुषतर्फ २० किलोदेखि ९० र महिलातर्फ २० देखि ८० किलोसम्मको तौल समूहमा प्रतिस्पर्धा गराइने आयोजकले जनाएको छ ।
प्रतियोगितामा स्वार्ण ५०, कास्य ५० र रजत १ सय गरेर २ सय जनाले पदक र प्रमाणपत्र प्राप्त गर्ने छन् । जिल्ला प्रथम, दोस्रो र तेस्रो हुनेलाई क्रमश १५ हजार, १० हजार र ५ हजार प्रदान गरिने आयोजकले उल्लेख गरेको छ ।
संघले हालसम्म ब्लाक बेल्ट वान डान २२ जना, ब्लाक बेल्ट टु डान २ जना र थ्री डान २ जना खेलाडी उत्पादन गरेको छ । प्रदेशभर खेलाडी संख्याको हिसाबले तेह्रथुमको आठराई गाउँपालिकामा ७० जना र मोरङको उर्लाबारी, कानेपोखरी र रंगेलीमा १ सय २० जना खेलाडीहरुले खेल खेलिरहेका छन् ।
प्रतियोगिता सम्पन्न गर्न ८ लाख ७० हजार रुपैयाँ लाग्ने अनुमान गरिएको छ । यसका लागि स्थानीय सरकार, संघसंस्था, खेलप्रेमी र दाताहरूसँग सहयोगको अपेक्षा गरिएको सीएच आईटीएफ तेक्वान्दो संघका अध्यक्ष तथा प्रमुख प्रशिक्षक युवराज भुजेलले बताए । सम्पूर्ण अभिभावक, संघसंस्था र खेलप्रेमीहरूलाई आर्थिक, नैतिक र भौतिक सहयोग गरेर प्रतियोगितालाई सफल बनाउन आग्रह गरेका छन् ।




















