
विराटनगर । सुनसरीको दुहबीमा चालकले सडकमै छाडेर हिँडेको कारबाट ठूलो परिमाणमा लागुऔषध गाँजा बरामद भएको छ ।
बा ७ च ९२६३ नम्बरको मारुती कारको डीकीबाट १ क्वीन्टलभन्दा बढी गाँजा बरामद भएको सुनसरी प्रहरीका प्रवक्ता डीएसपी योगराज खतिवडाले जानकारी दिए । उनका अनुसार इलाका प्रहरी कार्यालय दुहबीबाट खटिएको टोलीले दुहबी नगरपालिका–४ मालहट्टीबाट शनिबार कारलाई नियन्त्रणमा लिएको थियो ।

विशेष सूचनाका आधारमा प्रहरीले नियन्त्रणमा लिने प्रयास गरेसँगै कार सडकमै छाडेर चालक फरार भएका थिए । कार नियन्त्रणमा लिएर खानतलासी गर्दा डीकीभित्र जेब्रा झोलामा लुकाएर राखिएको १ सय १६ किलोग्राम गाँजा बरामद भएको डीएसपी खतिवडाले बताए ।
बरामद भएको गाँजा र गाँजा लोड गरिएको कारलाई नियन्त्रणमा लिएर इलाका प्रहरी कार्यालय दुहबीमा राखिएको छ । फरार रहेका कार चालकको खोजी भइरहेको र घटनाको थप अनुसन्धान सुरु गरिएको प्रहरीले जनाएको छ ।


























