
सिरहा । चार किल्ला सिफारिस बनाउने क्रममा पूर्वडाध्यक्षले वर्तमान वडाध्यक्षको हस्ताक्षर किर्ते गरेको पाइएको छ ।
सिरहाको नवराजपुर गाउँपालिका–२ का पूर्ववडाध्यक्ष खुशीलाल साहले वर्तमान वडाध्यक्ष सुरेशकुमार यादवको हस्ताक्षर र वडा कार्यालयको छाप किर्ते गरेको प्रारम्भिक अनुसन्धानबाट पत्ता लागेको हो । किर्ते गरेको पत्ता लागेपछि साहलाई प्रहरीले सोमबार पक्राउ गरेको छ ।
पक्राउ गरेर किर्ते जालसाजी मुद्दामा अनुसन्धान अघि बढाउन अदालतबाट म्याद थप गरिएको सिरहा प्रहरीका प्रवक्ता डीएसपी वीरेन्द्रकुमार पासवानले बताए । उनका अनुसार २०८० माघ १९ मा वडाध्यक्ष यादवको नक्कली हस्ताक्षर र वडा कार्यालयको छापसमेत किर्ते गरेको पाइएको हो ।
किर्ते गरेर पूर्वअध्यक्ष साहले ४ किल्ला सिफारिस बनाएको भन्दै उजुरी परेको थियो । उजुरीका आधारमा उनलाई पक्राउ गरेर प्रहरीले अनुसन्धान एवं कारबाहीको प्रक्रियामा लगेको छ ।
साह विसं २०७४ को स्थानीय तह निर्वाचनमा नेपाली कांग्रेसबाट नवराजपुर गाँउपालिका–२ को वडाध्यक्षमा निर्वाचित भएका थिए । पछि विसं २०७९ को निर्वाचनमा नेकपा (एमाले)बाट नवराजपुर गाउँपालिकाको अध्यक्षमा चुनाव लडेका थिए । तर, पराजित भए ।

























