
विराटनगर । मनमोहन मेमोरियल कप क्रिकेट (एमएम कप) प्रतियोगिताको तेस्रो संस्करण विराटनगरमा हुँदैछ । यसअघि एमएम कपको पहिलो र दोस्रो संस्करण सुनसरीको इनरुवामा भएको थियो ।
इनरुवाको मनमोहन मेमोरियल कप फाउण्डेसनले मंगलबार विराटनगरमा पत्रकार सम्मेलन गर्दै विराटनगरस्थित गिरिजाप्रसाद कोइराला क्रिकेट रंगशालामा प्रतियोगिताको तेस्रो संस्करण गर्न लागेको जानकारी दिइएको छ ।
फाउण्डेसनका अध्यक्ष विप्लव घोषले पत्रकार सम्मेलनमा वैशाख १३ देखि वैशाख २० गतेसम्म विराटनगरमा प्रतियोगिता आयोजना गर्न लागेको जानकारी दिए ।
उनले यसअघि सुनसरीको इनरुवामा आयोजना भएको प्रतियोगिताको तेस्रो संस्करण विराटनगरमा आयोजना गर्न लागेको बताए ।
इनरुवामा प्रतियोगिता हुँदै आए पनि यस पटक प्राविधिक कारणले गर्दा विराटनगरमा आयोजना गर्नु पर्यो ।
इनरुवाबाट सुरुवात गरेको प्रतियोगिता कोशी प्रदेश बाहेक अन्य प्रदेशमा गर्ने योजना रहेको अध्यक्ष घोषले सुनाए । क्रिकेटको उर्वरभूमि भनेर चिनिएको कोशी प्रदेशमा पछिल्लो समय खेलाडी उत्पादन हुन छाडेपछि क्रिकेट खेललाई चलायमान बनाउनका लागि प्रतियोगिता आयोजना गर्न थालेको उनले बताए ।
विगतमा राष्ट्रिय टोलीमा कोही न कोही खेलाडी कोशी प्रदेशका पर्ने गरेको सुनाउँदै, अध्यक्ष घोषले भने, ‘विगतमा धेरै प्रतियोगिता हुँदा नयाँ खेलाडी उत्पादन गर्न सहयोग पुग्थाे । तर, पछिल्लो समय प्रतियोगिता कम भएकै कारण र सम्बन्धित निकायले पनि नयाँ खेलाडी उत्पादन गर्नेतर्फ सोच नबनाएको हुँदा फाउण्डेसनले खेलाडी उत्पादनमा सहज हुने विश्वासका साथ प्रतियोगिताको तेस्रो संस्करण गर्न लागेको हो ।’
३ तहको सरकारले समन्वय गरेर कोशी प्रदेशमा स्तरीय खेल मैदान बनाउनु पर्छ । राज्यले खेल क्षेत्रमा पर्याप्त बजेट नदिँदा पनि खेलाडी उत्पादनमा समस्या आएको उनले बताए ।
वैशाख १३ देखि वैशाख २० गतेसम्म हुने प्रतियोगितामा ३ विभागीय टोलीसहित ६ टोलीको सहभागिता रहेको छ ।
टोलीलाई २ समूहमा विभाजन गरिएको छ । समूह ‘ए’ मा त्रिभुवन आर्मी क्लब, सशस्त्र प्रहरी बल (एपीएफ) र बागमती प्रदेश छ भने समूह ‘बी’ मा नेपाल पुलिस क्लब, कोशी प्रदेश र भारतको आसाम क्रिकेट टिम रहेको छ ।
५० ओभरको खेल लिग कम नकआउटका आधारमा हुनेछ । २ समूहको शीर्ष स्थानमा रहेका २ टोलीका बीच उपाधि जितका लागि खेल हुने छ ।
प्रतियोगिताको विजेताले ४ लाख, उपविजेताले २ लाखका साथै ट्रफी, मेडल प्राप्त गर्ने छन् भने व्यक्तिगत विधातर्फ प्लेयर अफ द टुर्नामेन्टले २५ हजार, उत्कृष्ट ब्याटर र उत्कृष्ट बलरले जनही १५ हजारका साथै दैनिक हुने प्लेयर अफ द म्याचले ४ हजार रुपैयाँ प्राप्त गर्ने छ ।
प्रतियोगिताको पहिलो र दोस्रो संस्करणको उपाधि त्रिभुवन आर्मी क्लबले जितेको थियो ।



















