
विराटनगर । ठूलो परिमाणमा गाँजा लोड गरिएको गाडी नेपालतर्फ बिसाएर भारतमा लागुऔषध ब्राउन सुगर (खैरो हेरोइन) लिन गएका १ जना मंगलबार दिउँसो सुनसरीबाट पक्राउ परेका छन् ।
भोजपुरको अरुण गाउँपालिका–५ का २६ वर्षीय तेजेन्द्र कार्कीलाई पक्राउ गरिएको सुनसरी प्रहरीका प्रवक्ता डीएसपी योगराज खतिवडाले जानकारी दिए । उनका अनुसार कार्कीलाई बिहान १०ः४० बजेतिर सुनसरीको कोशी गाउँपालिका–१ स्थित भन्सार कार्यालय नजिकबाट पक्राउ गरिएको हो ।
लागुऔषध नियन्त्रण ब्युरो विराटनगर र इलाका प्रहरी कार्यालय लौकहीको संयुक्त टोलीले भारतबाट नेपालतर्फ शंकास्पद तरिकाले आउँदै गरेका कार्कीलाई नियन्त्रणमा लिएर शरीर खानतलासी गरेको थियो । उनको साथबाट खैरो हेरोइनजस्तो देखिने वस्तु २ ग्राम बरामद भएको डीएसपी खतिवडाले बताए ।
उनका अनुसार नियन्त्रणमा लिएर सोधपुछ गर्दा प्रदेश १–०२–००२ च ५३४८ नम्बरको पिकअप गाडी नेपालतर्फ नै पार्किङ गरेर भारत गएको कार्कीले बताए । कोशी–१ लौकही बजारमा पार्किङ गरेर राखेको उक्त गाडी खानतलासी गर्दा ३ क्वीन्टलभन्दा बढी लागुऔषध गाँजा फेला परेको जानकारी खतिवडाले दिए ।
उनका अनुसार ११ वटा बोरामा ‘प्याक’ गरेर गाडीभित्र राखिएको ३ सय २३ किलोग्राम २ सय १० ग्राम गाँजा बरामद गरिएको हो । बरामद भएको लागुऔषध र गाडीसहित पक्राउ परेका कार्कीविरुद्ध लागुऔषध ऐनअन्तर्गतको मुद्दा चलाउन म्याद थप गरेर अनुसन्धानको बाँकी प्रक्रिया अघि बढाइएको प्रहरीले जनाएको छ ।
‘३ क्वीन्टलभन्दा बढी गाँजा लोड गरिएको पिकअप गाडी नेपालतर्फ नै पार्किङ गरेको पाइयो । चालक भने लागुऔषध खैरो हेरोइन लिनलाई भारततर्फ गएका रहेछन् । भारतबाट लिएर आउँदै गर्दा फेला पारेर पक्राउ गरियो । पछि सोधपुछ गर्दा गाँजा लोड गरेको गाडी बिसाएर गएको पाइयो,’ खतिवडाले भने ।
पछिल्लो समय सुनसरी प्रहरीले लागुऔषध नियन्त्रणमा सक्रियता बढाएको छ । सुनसरी प्रहरी प्रमुख एसपी सुमनकुमार तिम्सिनाले लागुऔषधको ओसारपसार एवं कारोबार नियन्त्रणमा लिन र यसको अवैध धन्दामा संलग्नलाई पक्राउ गर्न विशेष टोली परिचालन गरेका छन् ।
सुनसरी प्रहरीको सक्रियतासँगै विभिन्न प्रकारका लागुऔषधसहित त्यसको धन्दामा संलग्नहरु पक्राउ पर्ने क्रम तीव्र भएको छ । लागुऔषधविरुद्धको कारबाहीलाई व्यापक बनाइएको एसपी तिम्सिनाले बताए ।


























