सर्वोच्चका प्रस्तावित न्यायाधीशविरुद्ध ७ वटा उजुरी

काठमाडौं । सर्वोच्च अदालतका प्रस्तावित न्यायाधीशविरुद्ध ७ उजुरी परेको छ । सर्वोच्चका लागि प्रस्तावित ३ जना न्यायाधीशविरुद्ध उजुरी परेको हो ।

संसदीय सुनुवाइ समितिमा ५ वटा व्यक्ति केन्द्रित र २ वटा सुनुवाइ प्रक्रियासँग सम्बन्धित उजुरी दर्ता भएको जनाइएको छ । उजुरीबारे समिति सभापति ईश्वरीदेवी न्यौपानेले बैठकमा जानकारी गराएकी छन् । को बारे, के उजुरी भन्ने खुल्न बाँकी छ ।

उजुरीकर्तालाई शुक्रबार समितिको बैठकमा आमन्त्रण गरिएको छ । वरिष्ठ अधिवक्ता मेघराज पोखरेल, उच्च अदालत जनकपुरका मुख्य न्यायाधीश श्रीकान्त पौडेल र उच्च अदालत दिपायलका मुख्य न्यायाधीश शान्तिसिंह थापाको नाम सर्वोच्चको न्यायाधीशमा सिफारिस भएको थियो ।

प्रस्तावित न्यायाधीशविरुद्ध परेको उजुरीउपर आगामी आइतबार संसदीय समितिमा सुनुवाइ हुने बताइएको छ । समिति सभापति न्यौपानेले ३ जना प्रस्तावित न्यायाधीशमाथिको सुनुवाइ आइतबार हुने बताइन् ।