भारतीय नर्स निमिषा प्रियालाई जुलाई १६ मा फाँसी दिइने

एजेन्सी । यमनमा मृत्युदण्डको सजाय भोगिरहेकी भारतीय नर्स निमिषा प्रियालाई जुलाई १६ मा फाँसी दिइने भएको छ ।

केरला राज्यकी ४४ वर्षीया निमिषाले सन् २००८ मा यमनको राजधानी सानामा नर्सको रूपमा काम सुरु गरेकी थिइन् । पछि उनले क्लिनिक खोलेर स्थानीय व्यापारी तलाल अब्दो महदीसँग साझेदारी गरेकी थिइन् ।

Advertisement

सम्बन्ध विग्रिएपछि महदीलाई लागूपदार्थको सुई दिएर हत्या गरेको अभियोगमा सन् २०२० मा यमनी अदालतले निमिषालाई मृत्युदण्ड सुनाएको हो । उनीविरुद्धको फैसला यमनको सर्वोच्च अदालतले सन् २०२३ मा सदर गरेको थियो । सन् २०२४ को जनवरीमा हुथी विद्रोहीहरूको सर्वोच्च राजनीतिक परिषदले मृत्युदण्डको अनुमोदन गरेपछि उनको फाँसीको मिति तय गरिएको हो।

भारतमा उनको पक्षमा बचाउ अभियान चलिरहेको छ। परिवारले ‘रक्तपैसा’को व्यवस्था गरी फाँसी रोक्न यमनी पीडित परिवारसँग सहमति खोजिरहेको छ। तर, पीडित परिवार सम्पर्कबाहिर रहेकाले प्रक्रिया अवरुद्ध छ।

भारत सरकारमाथि कूटनीतिक पहल गर्न दबाब बढेको छ। यदि सम्झौता हुन नसके, १६ जुलाईमा निमिषालाई यमनमा फाँसी दिइने विभिन्न सञ्चारमाध्यमले जनाएका छन्। यो पछिल्ला वर्षहरूमा विदेशी भूमिमा मृत्युदण्ड पाउने दुर्लभ प्रकरण हो ।