तरकारी बोक्ने गाडीमा ३ क्वीन्टल गाँजा

Share this
648shares
मुलुकी खबर
मुलुकी खबर
clock२०८२ असोज ५, आइतबार १२:०५

रौतहट । रौतहटमा तरकारी बोक्ने गाडी प्रयोग गरेर भारततर्फ लैजाँदै गरिएको गाँजा प्रहरीले बरामद गरेको छ । गाँजा ३ क्वीन्टल बढी छ ।

शनिबार राति इशनाथ नगरपालिका–८ मोतिपुर सडकखण्डमा नियमित गस्तीमा खटिएको प्रहरी टोलीले प्रदेश ३–०१–०२२ च १८६१ नम्बरको पिकअप गाडी नियन्त्रणमा लिएको थियो । गाडीमा काउली राखिएको देखिए पनि चेकजाँच गर्दा तरकारीको भित्रतिर २६ वटा पोकोमा बाँधिएको ३ सय ३४ किलो गाँजा भेटिएको प्रहरीले जनाएको छ।

रौतहट प्रहरीका प्रवक्ता डीएसपी राजु कार्कीका अनुसार १९ पोकोमा १५ किलोका दरले २ सय ८५ किलो र बाँकी ७ पोकोमा ७ किलोका दरले ४९ किलो गरी जम्मा ३ सय ३४ किलो गाँजा बरामद भएको हो । उक्त गाँजा माथिबाट करिब २० किलो काउलीले छोपेर लुकाइएको थियो ।

गाडी मोतिपुरबाट जटहरा हुँदै भारततर्फ जाँदै गरेको अवस्थामा प्रहरीले रोकेको हो । तर, प्रहरीले गाडी नियन्त्रणमा लिन खोज्नेबित्तिकै चालक फरार भएका थिए ।

बरामद गरिएको गाँजा र गाडी अहिले प्रहरी नियन्त्रणमा राखिएको छ । फरार चालक र गाँजा तस्करको खोजी तीव्र बनाइएको डीएसपी कार्कीले बताए ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.