जाँचबुझ आयोगले माग्यो जेनजी प्रदर्शनमा भएको क्षतिको विवरण

मुलुकी खबर

२०८२ आश्विन २६, आइतबार १९:४९

काठमाडौं । गत भदौ २३ र २४ गते जेनजी आन्दोलनका क्रममा देशका विभिन्न भागमा भएको आगजनी, तोडफोडलगायतका घटनाबारे अध्ययन गर्न बनेको जाँचबुझ आयोगले क्षतिको विस्तृत विवरण माग गरेको छ ।

आयोगका सदस्य तथा प्रवक्ता विज्ञानराज शर्माले आइतबार विज्ञप्ति जारी गर्दै राजनीतिक दल, संघसंस्था र व्यक्तिगत सम्पत्तिमा भएको भौतिक तथा आर्थिक क्षतिको यथार्थ विवरण पठाउन अनुरोध गरेका हुन् । विज्ञप्तिमा आयोगले भनेको छ, ‘भदौ २३ र २४ गतेका घटनाका क्रममा काठमाडौं उपत्यकासहित देशका विभिन्न भागमा राजनीतिक दल, संघसंस्था र व्यक्तिगत सम्पत्तिमा भएको क्षतिको यथार्थ विवरण आयोगको इमेल ठेगानामा पठाउनु हुन अनुरोध छ ।’

आयोगले घटनालाई पुष्टि गर्ने प्रमाणका रूपमा उपलब्ध श्रव्यदृश्य, फोटो, र कागजातहरू पनि पठाउन आग्रह गरेको छ । आयोगले हुलाकमार्फत पनि विवरण पठाउन सकिने व्यवस्था गरेको छ ।

तर, हुलाकबाट पठाइएका विवरणहरूको सफ्टकपी अनिवार्य रूपमा आयोगको इमेलमा पठाउनुपर्ने जनाइएको छ । यसरी मागिएको विवरणमा क्षतिको स्वरूप, समय, स्थान, अनुमानित मूल्य, कारण र संलग्न पक्षहरूबारे स्पष्ट विवरण समेट्न आयोगले निर्दिष्ट ढाँचा तयार पारेको बताइएको छ ।

जेनजी आन्दोलनका क्रममा मुलुकका विभिन्न सहरहरूमा आगजनी र तोडफोडबाट देशका विभिन्न ठाउँमा सरकारी एवं व्यक्तिगत सम्पत्तिमा क्षति पुगेको थियो । केही स्थानमा सरकारी गाडी र कार्यालयमा आगजनी एवं तोडफोड गरिएको थियो भने निजी सवारीसाधन र पसलहरू पनि त्यसको चपेटमा परेका थिए ।

आयोगका प्रवक्ता शर्माले विज्ञप्तिमा भनेका छन्, ‘यो आयोग घटनाको सम्पूर्ण पृष्ठभूमि, कारण, प्रभाव र परिणामबारे अध्ययन गर्न गठन भएको हो । त्यसैले प्रदर्शनका क्रममा भएको क्षति, त्यसको असर र प्रमाणित विवरण संकलन गर्नु आयोगको पहिलो प्राथमिकता हो ।’ उनका अनुसार आयोगले प्राप्त विवरणका आधारमा क्षतिको यथार्थ तथ्यांक तयार गर्नेछ र त्यसका आधारमा सरकारलाई प्रतिवेदन बुझाउने छ ।

मन्त्रिपरिषद्को बैठकले घटनाबारे सत्यतथ्य पत्ता लगाउन उच्चस्तरीय जाँचबुझ आयोग गठन गरेको थियो । आयोगलाई घटनाको वास्तविकता, प्रदर्शनका कारण र त्यस क्रममा सुरक्षा निकायको भूमिकासमेत अध्ययन गरी सिफारिससहित प्रतिवेदन पेस गर्ने कार्यादेश छ ।

तपाइको प्रतिक्रिया