‘होस्टेल ३’ ले भारतमा पनि इतिहास रच्यो

काठमाडौं । नेपाली चलचित्र उद्योगका लागि गौरवको खबर! बहुचर्चित चलचित्र ‘होस्टेल ३’ ले नेपालमा जस्तै सीमापारि भारतमा पनि ऐतिहासिक सफलता कायम गरेको छ। नेपालमा ५१ दिन लगातार प्रदर्शनको रेकर्ड बनाएको यो फिल्मले अब भारतको दार्जिलिङमा पनि सोही सफलता दोहोर्‍याउँदै ५१ दिन पूरा गरेको छ।

भारतको दार्जिलिङस्थित एसभिएफ सिनेमा, रिंक मल मा सेप्टेम्बर ५ देखि निरन्तर प्रदर्शन भइरहेको। यो चलचित्र सिक्किम, दार्जिलिङ, सिलगुडी, सिन्ताम, गुवाहाटी, आसाम र मणिपुरसहित ५० भन्दा बढी हलमा एकैसाथ प्रदर्शन गरिएको थियो। भारतमा ‘होस्टेल ३’ को वितरण गोर्खा फिल्म प्रोडक्सन र सुपर सिनेमाले गरेका हुन्। वितरक सुरज खड्काले दार्जिलिङमा ५१ दिन पूरा भएको जानकारी दिएका छन्।

Advertisement

निर्देशक सशान कँडेलले भारतमा पाएको यो अपार सफलताप्रति खुसी व्यक्त गर्दै भने, “सर्वप्रथम, यति ठुलो फ्रेन्चाइजलाई विश्वास गरी निर्माण इजाजत दिनुहुने दुर्गिश फिल्म्सलाई धेरै धन्यवाद। निर्माण, वितरण र प्रचार प्रसारमा संलग्न सबैलाई हार्दिक आभार व्यक्त गर्दछु।”

क्याम्पस जीवनका उतार चढाव, प्रेम, मित्रता र सङ्घर्षको कथा बोकेको ‘होस्टेल ३’ मा पारस बम ठकुरी (कुलब्वाय), रिहान गिरी, पदम तामाङ, आशिष घिमिरे, सिम्रन पन्त, हेना नगरकोटी, समा पराजुली, उमर खान, सन्तोष बानियाँ र आशिष पुरुष लगायतका कलाकारहरूको दमदार अभिनय रहेको छ।

हलमा ऐतिहासिक व्यापार गरेपछि, ‘होस्टेल ३’ हाल नेपालको अग्रणी ओटीटी प्लेटफर्म ‘सिनेमाघर एप’ मा पनि स्ट्रिमिङ भइरहेको छ। दर्शकहरूले यो एप विभिन्न डिजिटल माध्यमहरूबाट डाउनलोड गरी जुनसुकै बेला सहजै हेर्न सक्नेछन्।