टी-२० विश्वकप: सुपर-८ का लागि आज इंग्ल्यान्ड र स्कटल्यान्ड भिड्दै

मुम्बई। टी-२० विश्वकप अन्तर्गत समूह ‘सी’ मा रहेका इंग्ल्यान्ड र स्कटल्यान्ड आज प्रतिष्ठाको लडाइँमा उत्रँदै छन्। सुपर आठको सम्भावना जीवित राख्न दुवै टोलीका लागि आजको खेल ‘गर या मर’ जस्तै बनेको छ।

नेपालसमेत रहेको यस समूहबाट शीर्ष दुई टोली मात्र अर्को चरणमा पुग्ने भएकाले आजको खेल निकै निर्णायक हुनेछ। इंग्ल्यान्डले आफ्नो पहिलो खेलमा नेपालमाथि ४ रनको कठिन जित निकालेको थियो भने दोस्रो खेलमा वेस्टइन्डिजसँग हार बेहोरेको थियो। उता स्कटल्यान्डले पनि वेस्टइन्डिजसँग हारे पनि इटालीलाई पराजित गर्दै १ जित दर्ता गरिसकेको छ। हाल समूह ‘सी’ मा दुई जितसहित वेस्टइन्डिज शीर्ष स्थानमा छ।

Advertisement

आजको खेल कोलकाताको इडन गार्डेनमा नेपाली समय अनुसार दिउँसो ३:१५ बजे सुरु हुनेछ। यो खेलपछि इंग्ल्यान्डले इटालीसँग र स्कटल्यान्डले नेपालसँग आफ्नो अन्तिम खेल खेल्न बाँकी छ। विश्वकपका अन्य खेलहरूमा आज बिहान ११:१५ बजे आयरल्यान्ड र ओमानबीच कोलम्बोमा तथा साँझ ७:१५ बजे न्युजिल्यान्ड र साउथ अफ्रिकाबीच अहमदाबादमा प्रतिस्पर्धा हुनेछ।