‘जिरो डिग्री’को व्यङ्ग्यात्मक गीत ‘अरे हो नेता जी’ सार्वजनिक

काठमाडौँ। छायाङ्कनको तयारीमा रहेको चलचित्र ‘जिरो डिग्री’को पहिलो गीत ‘अरे हो नेता जी’ सार्वजनिक भएको छ। समसामयिक राजनीति र नेताहरूका आश्वासनप्रति तिखो व्यङ्ग्य गरिएको यो गीत मङ्गलवार ‘मुभिज् डिजीटेन्मेन्ट’ युट्युब च्यानलमार्फत सार्वजनिक गरिएको हो।

गीतमा लोकप्रिय अभिनेता विजय बराल र गायक अङ्कित बाबु अधिकारीको स्वर रहेको छ। अङ्कित बाबु अधिकारीकै सङ्गीत रहेको यस गीतका शब्दहरू युवराज काफ्लेले लेखेका हुन्। गीतको भिडियोमा अभिनेता विजय बराललाई प्रस्तुत गरिएको छ, जसमा आम नागरिकले विकासका बारेमा प्रश्न गर्दा नेताहरूले दिने टालटुले जवाफ र ‘यही हो विकास’ भन्दै पन्छिने प्रवृत्तिलाई व्यङ्ग्यात्मक शैलीमा उतारिएको छ।

मेघौली फिल्म्सको ब्यानरमा निर्माण हुन लागेको ‘जिरो डिग्री’को कथावस्तु निकै मौलिक र कौतुहलपूर्ण छ। सडक सञ्जालले समेत नछोएको एउटा दुर्गम गाउँमा आमाबुवाको निधनपछि विदेशमा रहेका सन्तान नआउञ्जेल शव सुरक्षित राख्न ‘डीप फ्रिज’ गाउँ पुर्‍याउँदा उत्पन्न हुने उथलपुथल र घटनाहरूमा चलचित्र आधारित छ।

निर्देशकका अनुसार यो चलचित्र ‘डार्क कमेडी’ जनरामा निर्माण हुन लागेको हो। यो केवल फ्रिज गाउँ पुर्‍याउने कथा मात्र नभई नेपाली समाजका गहिरा यथार्थहरू र दुर्गम क्षेत्रको अवस्थालाई उजागर गर्ने एउटा प्रयास रहेको निर्माण पक्षले बताएको छ।