२ लाख ४० हजार किशोरीले लगाए पाठेघरको मुखको क्यान्सरविरुद्ध खोप

काठमाडौं। नेपालमा पाठेघरको मुखको क्यान्सरविरुद्धको ‘ह्युमन पापिलोमा भाइरस’ (एचपिभी) खोप करिब २ लाख ४० हजार किशोरीले लगाएका छन् । स्वास्थ्य तथा जनसङ्ख्या मन्त्रालयले गत माघ २५ देखि फागुन १५ गतेसम्म सञ्चालन गरेको अभियानमा २ लाख ३७ हजार ९७२ जना किशोरी सहभागी भएको स्वास्थ्य सेवा विभाग बालस्वास्थ्य तथा खोप शाखाका प्रमुख डा. अभियान गौतमले जानकारी दिए ।

नियमित खोप लगाउने २ लाख १५ हजार ३१४ जना र गत वर्षको अभियानमा छुटेका २२ हजार ६४८ जना किशोरीले यसपटक खोप सेवा लिएका छन् । डा. गौतमका अनुसार अभियानमा नियमिततर्फ कक्षा ६ मा पढ्ने २ लाख १ हजार ८९ छात्रा र विद्यालय नजाने १० वर्ष उमेर समूहका १३ हजार ५८५ किशोरी छन् ।

यस्तै, गत वर्ष छुटेका र अहिले कक्षा ७ देखि १० सम्म पढिरहेका १४ हजार ५८६ छात्रा तथा ११ देखि १४ वर्षका विद्यालय नजाने ८ हजार ४९ किशोरीले पनि खोप लगाएका छन् । उनीहरूलाई पायक पर्ने विद्यालय र स्वास्थ्य संस्थामा खोप लगाउने व्यवस्था मिलाइएको थियो । धनुषा, महोत्तरी, अर्घाखाँची, गुल्मी, पाल्पा र रोल्पा जिल्लाबाट भने विवरण प्राप्त हुन बाँकी रहेको शाखाले जनाएको छ ।

हिमाली भेगका डोल्पा, हुम्ला, जुम्ला र मनाङ जिल्लामा भने विद्यालय बिदा भएका कारण अभियान सञ्चालन हुन सकेन । ती जिल्लामा आगामी चैत महिनामा खोप अभियान सञ्चालन गरिने डा गौतमले बताए । पाठेघरको मुखको क्यान्सरको जोखिम बढाउने मुख्य कारण ह्युमन पापिलोमा भाइरस सङ्क्रमण रहेकाले त्यसबाट बच्न यो खोप प्रभावकारी मानिन्छ ।