
काठमाडौं । यातायात व्यवसायीले सरकारले भाडा समायोजन नगरे स्वघोषणा गरेर भाडा लिन बाध्य हुने चेतावनी दिएका छन् ।
नेपाल यातायात व्यवसायी राष्ट्रिय महासंघले शुक्रबार विज्ञप्ति जारी गर्दै लामो समयदेखि सरकारसँग भाडा समायोजनको माग गर्दा पनि सुनुवाइ नभएको जनाएको छ । महासंघका अनुसार पेट्रोलियम पदार्थको मूल्य बारम्बार बढिरहँदा यातायात सेवा सञ्चालन महँगो हुँदै गएको छ । तर, भाडा समायोजन नहुँदा व्यवसायीहरू दैनिक रूपमा ठूलो घाटामा सञ्चालन गर्न बाध्य छन् ।
महासंघले हवाई इन्धनको मूल्य बढ्नेबित्तिकै हवाई भाडा समायोजन हुने तर सडक यातायातको भाडा समायोजनमा सरकार उदासीन रहेको आरोप समेत लगाएको छ । विज्ञप्तिमा २०७२ सालदेखि भाडा समायोजन नभएको उल्लेख गर्दै मूल्यवृद्धिका आधारमा यात्रुवाहक, मालवाहक र पहाडी मार्गका भाडा दर वैज्ञानिक ढंगले समायोजन गर्न माग गरिएको छ । माग पूरा नभए अब स्वघोषित दर लागू गर्ने वा सेवा सञ्चालनमै समस्या आउन सक्ने चेतावनी व्यवसायीले दिएका छन् ।



















