प्रतीकात्मक तस्बिरझापा । झापाको एउटा सिरक गोदाममा बुधबार आगलागी हुँदा ६० लाख बराबरको क्षति भएको छ ।
अर्जुनधारा नगरपालिका–११ बुट्टाबारीस्थित नुर मोहमदको सिरक गोदाममा अपरान्ह १२ बजेबाट अचानक आगलागी सुरु भएको थियो । नेपाली सेना, नेपाल र सशस्त्र प्रहरी, विभिन्न स्थानबाट पुगेका दमकल र स्थानीयको सहयोगमा अढाई घण्टापछि आगो नियन्त्रणमा आएको थियो ।
प्रहरीका अनुसार आगलागीबाट सिरक गोदामको टिनको बेरा र छानो भएको घर, घरभित्र रहेको रुवा बनाउने मेसिन र रुवाहरु पूर्ण रुपमा जलेर ध्वस्त भएको छ । घटनामा मानवीय र चौपाया क्षति नभए पनि ६० लाख मूल्य बराबरको क्षति भएको प्रहरीले जनाएको छ ।
उक्त गोदाम नुर मोहमदको श्रीमती रौतहट घर भई बिर्तामोड नगरपालिका–५ मा डेरा बस्ने ५६ वर्षीया सलमा खातुनको नाममा रहेको पाइएको छ । जग्गा भाडामा लिएर बिर्तामोड कपास प्रशोधन उद्योग सञ्चालन गर्दै आइरहेको पाइएको प्रहरीको भनाइ छ ।
आगलागीको कारण खुल्न सकेको छैन । यद्यपि, विद्युत सर्ट भएर आगलागी भएको हुनसक्ने प्रहरीको अनुमान छ । प्रहरीले घटनाको थप अनुसन्धान भइरहेको जनाएको छ ।



















