बिदाका दिनमा पनि थुनछेकका लागि अदालत खुला राख्न सर्वोच्चको परिपत्र

काठमाडौं । सर्वोच्च अदालतले सार्वजनिक बिदाका दिनमा समेत पक्राउ परेका व्यक्तिहरूलाई संविधानले तोकेको समयभित्रै अदालतमा उपस्थित गराउन मातहतका सबै अदालतलाई परिपत्र जारी गरेको छ । नागरिकको संवैधानिक हक सुनिश्चित गर्न र न्यायिक प्रक्रियामा अवरोध आउन नदिन शुक्रबार बसेको सर्वोच्चको पूर्ण बैठक (फुल कोर्ट) ले यस्तो निर्णय गरेको हो ।

नेपालको संविधानको धारा २० को उपधारा (३) अनुसार पक्राउ परेको व्यक्तिलाई बाटोको म्याद बाहेक २४ घण्टाभित्र मुद्दा हेर्ने अधिकारीसमक्ष उपस्थित गराउनुपर्ने अनिवार्य व्यवस्था छ । तर, सरकारले शनिबार र आइतबार दुई दिन सार्वजनिक बिदा दिने निर्णय गरेपछि बिदाका दिन पक्राउ पर्नेहरूलाई समयमै अदालतमा पेस गर्न व्यावहारिक कठिनाइ उत्पन्न भएको थियो । यही समस्या समाधान गर्न सर्वोच्चले उच्च अदालत, जिल्ला अदालत, विशेष अदालत र अन्य न्यायाधिकरणहरूलाई बिदाका दिनमा पनि आवश्यक प्रबन्ध गर्न निर्देशन दिएको छ ।

Advertisement

परिपत्रअनुसार अब बिदाको समयमा पनि पक्राउ पुर्जीको अनुमति, जारी पुर्जीको स्वीकृति, हिरासतमा राख्ने अनुमति र मुद्दासँग सम्बन्धित थुनछेक आदेशका लागि अदालतहरू खुला रहनेछन् । यसका लागि न्यायिक व्यवस्थापनसम्बन्धी निर्देशिका, २०७५ बमोजिम जनशक्ति र इजलासको व्यवस्थापन गर्न सर्वोच्चले भनेको छ । यो निर्णयसँगै अब सार्वजनिक बिदाका कारण कुनै पनि व्यक्तिले २४ घण्टाभन्दा बढी समय गैरकानुनी रूपमा हिरासतमा बस्नुपर्ने अवस्थाको अन्त्य हुने अपेक्षा गरिएको छ ।