सेयर बजारमा ४ अर्बको चलखेल: बीमा कम्पनीको फन्ड दुरुपयोग भएको बोर्डको निष्कर्ष

Share this
735shares
मुलुकी खबर
मुलुकी खबर
clock२०८३ बैशाख ९, बुधबार २०:४७

काठमाडौं । नेपाल धितोपत्र बोर्डले गरेको एक विशेष अनुसन्धानले सेयर बजारको चलखेलमा बीमा कम्पनीहरूको अर्बौँ रुपैयाँ ‘फन्ड’ दुरुपयोग हुने गरेको सनसनीपूर्ण तथ्य फेला पारेको छ ।

बोर्डको सुपरीवेक्षण विभागको प्रतिवेदनअनुसार व्यवसायी दीपक भट्ट र उनको समूहले विभिन्न बीमा कम्पनीको करिब ४ अर्ब रुपैयाँ दुरुपयोग गरी धितोपत्र बजारलाई प्रभावित पारेको देखिएको छ ।

अनुसन्धानअनुसार भट्टको समूहले आफूहरूकै मुख्य सेयर हिस्सा रहेका बीमा कम्पनीहरूको रकम प्रयोग गरी सेयरको मूल्यमा अस्वाभाविक उतारचढाव ल्याउने गरेको पाइएको छ ।

भट्टले सुरुमा व्यक्ति तथा निजी कम्पनीका नाममा सस्तोमा सेयर खरिद गर्ने र पछि कृत्रिम रूपमा मूल्य बढाएर ती सेयरहरू आफ्नो प्रभावमा रहेका पब्लिक लिमिटेड कम्पनी (बीमा कम्पनी) लाई महँगोमा भिडाउने गरेको बोर्डको निष्कर्ष छ ।

यस कार्यमा भट्टले ३ अर्ब ८० करोड रुपैयाँको उधारो सेयर कारोबार गरेको र भृकुटी स्टक ब्रोकिङ कम्पनीले अग्रिम रकम विनै कारोबारको सीमा उपलब्ध गराएको देखिएको छ ।

बोर्डले यस प्रकरणका मुख्य पात्रका रूपमा दीपक भट्ट र भृकुटी स्टक ब्रोकिङका सिइओ संदिप चाचानलाई उभ्याएको छ । उनीहरूले धितोपत्र सम्बन्धी ऐन २०६३ विपरित बजार प्रभावित पार्ने र जालसाजीयुक्त कारोबार गरेको ठहर गर्दै बोर्डले भृकुटी स्टक ब्रोकिङलाई निलम्बन गरेको छ ।

साथै, यस कार्यमा सहयोगी भूमिका खेल्ने हिमालयन रि-इन्स्योरेन्स, नेपाल रि-इन्स्योरेन्स, विभिन्न माइक्रो इन्स्योरेन्सहरू र प्रतिष्ठित व्यापारिक घरानाका व्यक्तिहरूमाथि थप अनुसन्धान गर्न प्रहरी प्रधान कार्यालयमा सिफारिस गरिएको छ ।

प्रतिवेदनमा राजबहादुर शाह, शेखर गोल्छा, शुभी अग्रवाल, ऋषिराज मोर लगायतका व्यक्तिहरू र विभिन्न इन्भेष्टमेन्ट कम्पनीहरूको संलग्नता देखिएको उल्लेख छ ।

बोर्डले यो अनुसन्धान प्रतिवेदनलाई ऐतिहासिक निर्णय भन्दै बीमा प्राधिकरण, सम्पत्ति शुद्धीकरण अनुसन्धान विभाग र नेपाल प्रहरीलाई आवश्यक कारबाहीका लागि पत्राचार गरिसकेको छ । यसले पुँजी बजारमा हुने संस्थागत अनियमिततालाई नियन्त्रण गर्न र सर्वसाधारणको लगानी सुरक्षित गर्न मद्दत पुग्ने बोर्डका अधिकारीहरूको विश्वास छ ।

तपाइको प्रतिक्रिया
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
विराटनगरमा राति २ बजेसम्म व्यवसाय खोल्न पाइने, अनुमति प्रक्रिया सुरु
भारतीयका परिवार नै मिलेर नेपालमा लागुऔषध ‘सप्लाई’ : मोरङको रंगेलीबाट बुवा, आमा र छोरा पक्राउ
थाइल्यान्डमा एक भवनमा भीषण आगलागी, ११ जनाको मृत्यु
‘साउदीको अमेजनका गोदाममा नेपालीसहितका श्रमिक शोषणमा’
मोरङमा सेप्टिक ट्यांकीभित्र बालकको शव फेला
राजबहादुर शाह सर्वाधिक व्यक्तिगत करदाता घोषित
© 2024 Muluki Khabar. All Rights Reserved. Design & Develop By: Indesign Media Pvt. Ltd.