एसइई कप: मोर्डन एरा र मोरङ पब्लिक सेमिफाइनलमा

विराटनगर । विराटनगरमा जारी ‘मिल्स फार्क क्लब एसइई अन्तर विद्यालय’ फुटबल प्रतियोगितामा विराटनगरको मोर्डन एरा स्कुल र बुढीगंगाको मोरङ पब्लिक स्कुल सेमिफाइनलमा प्रवेश गरेका छन् ।

विराटनगरको मिल्स फार्क क्लबले जुट मिलको खेल मैदान आयोजना गरेको प्रतियोगिताको पहिलो दिनको खेलहरूमा जित निकाल्दै मोर्डन एरा र पब्लिक स्कुल सेमिफाइनलमा पुगेका हुन् ।

पहिलो खेलमा मोरङ पब्लिक स्कुलले विराटनगरको ग्रेडेड स्कुललाई ४–० को फराकिलो गोल अन्तरमा हरायो । मोरङ पब्लिकका पदम दोर्जे तामाङले २ गोल गरे भने आयुष विश्वास र प्रज्ज्वल चौधरीले समान १–१ गोल गर्दै टोलीलाई विजयी बनाए ।

त्यस्तै, दोस्रो खेलमा मोर्डन एराले ग्रामथानको शारदा स्कुललाई १–० गोलले पराजित गर्दै सेमिफाइनलको यात्रा तय गर्‍यो । मोर्डन एराका लागि सुशान्त रोइलाले निर्णायक गोल गरे । खेलको ‘प्लेयर अफ द म्याच’ सुशान्त नै घोषित भए ।

प्रतियोगिताअन्तर्गत आइतबारको पहिलो खेल विराटनगरको एभरेस्ट स्कुल र अपर्ण स्कुलबीच तथा दोस्रो खेल गोदावरी र सनसाइन स्कुलबीच हुने आयोजकले जनाएको छ । वैशाख २३ गतेसम्म सञ्चालन हुने प्रतियोगितामा ८ टोलीको सहभागिता रहेको छ । प्रतियोगिताको विजेताले नगद ३१ हजार र उपविजेताले १६ हजार रुपैयाँका साथै ट्रफी प्राप्त गर्ने छन् ।

प्रतियोगिताको उद्घाटन विराटनगर १५ नम्बरका वडाध्यक्ष प्रकाश साह, विराट गोल्डकप ट्रस्टका अध्यक्ष किशोरबहादुर शाही, प्याब्सन मोरङका उपाध्यक्ष विष्णु डंगोल, मिल्स फार्क क्लब रानीका अध्यक्ष धनबहादुर तामाङ लगायतको उपस्थिति रहेको थियो ।