मोरङबाट खैरो हेरोइनसहित ८ जना पक्राउ

विराटनगर । मोरङबाट लागुऔषध ब्राउन सुगर (खैरो हेरोइन)सहित सोमबार र आइतबार ८ जना पक्राउ परेका छन् । रंगेली र कानेपोखरीबाट ४–४ जना पक्राउ परेका हुन् ।

इलाका प्रहरी कार्यालय रंगेली र लागुऔषध नियन्त्रण ब्यूरो विराटनगरको संयुक्त टोलीले सोमबार अपरान्ह ४ बजेतिर रंगेली नगरपालिका–४ चोप्राहबाट दुई जनालाई पक्राउ गरेको छ । भारतबाट को २८ प ९०९३ नम्बरको मोटरसाइकलमा नेपाल प्रवेश गरेका चालक बेलबारी नगरपालिका–६ का २१ वर्षीय समीर राई र पछाडि सवार बेलबारी–४ का ३४ वर्षीय शक्ति राई पक्राउ परेका छन् ।

Advertisement

उनीहरु सवार मोटरसाइकल रोकेर चेकजाँच गर्दा पछाडि सवार शक्तिले मलद्वारमा लुकाइछिपाइ ल्याएको कालो रङको प्लाष्टिकको पोका फेला परेको प्रहरीले जनाएको छ । प्रहरीका अनुसार उक्त प्लाष्टिकको पोकाबाट २० ग्राम ९ सय मिलिग्राम ब्राउन सुगर बरामद भएको छ ।

बरामद भएको लागुऔषध र नियन्त्रणमा लिइएको मोटरसाइकलसहित दुवै जनालाई इलाका प्रहरी कार्यालय रंगेलीमा राखिएको छ । दुवै जनाविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।

त्यस्तै, रंगेली–४ चोप्राहबाट सोमबार साँझ नै खैरो हेरोइनसहित एक जना पक्राउ परेका छन् । भारतबाट पैदल नै नेपालतर्फ आउँदै गरेका रंगेली–७ का २५ वर्षीय कार्तिककुमार मण्डललाई प्रहरीले साँझ ६ बजेतिर पक्राउ गरेको हो ।

इलाका प्रहरी कार्यालय रंगेली र लागुऔषध नियन्त्रण ब्यूरो विराटनगरको टोलीले मण्डलको साथबाट ३ ग्राम ब्राउन सुगर बरामद गरेको छ । प्रहरीका अनुसार उनले लगाएको पाइन्टको दाहिने गोजीमा कालो रंगको प्लाष्टिकमा पोको पारेर राखेको अवस्थामा ब्राउन सुगर बरामद भएको हो ।

त्यस्तै, रंगेली–४ चोप्राहबाटै सोमबार साँझ अर्का व्यक्ति पनि पक्राउ परेका छन् । मोरङको पथरीशनिश्चरे नगरपालिका–६ का २९ वर्षीय मुकेश महतोलाई साँझ ६ः१५ बजेतिर पक्राउ गरिएको प्रहरीले जनाएको छ ।

भारतबाट पैदल नै नेपालतर्फ आउँदै गरेका महतोलाई प्रहरीले नियन्त्रणमा लिएर शरीर खानतलासी गर्दा साथबाट ७ ग्राम ५९० मिलिग्राम ब्राउन सुगर बरामद भएको जनाइएको छ । उनीविरुद्ध पनि लागुऔषध ऐनअन्तगर्तको मुद्दा चलाउने प्रहरीको तयारी छ ।

त्यस्तै, मोरङको कानेपोखरी गाउँपालिका–६ शिवशक्ति चोकबाट आइतबार राति ४ जना पक्राउ परेका छन् । प्रहरी चौकी रमाइलोबाट खटिएको टोलीले कानेपोखरी–६ का २० वर्षीय प्रज्वल राई, १८ वर्षीय अन्जन जिमी, २६ वर्षीय लोकेश घले र १८ वर्षीय राज विकलाई राति १० बजेतिर पक्राउ गरेको हो ।

पक्राउ परेकाको साथबाट ३ ग्राम ८५० मिलिग्राम ब्राउन सुगर बरामद भएको प्रहरीले जनाएको छ । उनीहरुविरुद्ध लागुऔषध ऐनअन्तर्गतको मुद्दा चलाउन अदालतबाट म्याद थप गरेर इलाका प्रहरी कार्यालय पथरीले अनुसन्धानको बाँकी प्रक्रिया अघि बढाएको छ ।