चिनी निर्यातमा प्रतिबन्ध

एजेन्सी । भारत सरकारले चिनी निर्यातमा कडा प्रतिबन्ध लगाएको छ । भारतको वाणिज्य तथा उद्योग मन्त्रालयअन्तर्गतको विदेश व्यापार महानिर्देशनालयले जारी गरेको सूचनाअनुसार कच्चा, सेतो तथा प्रशोधित सबै प्रकारका चिनीको निर्यात आगामी ३० सेप्टेम्बर २०२६ सम्मका लागि रोकिएको हो ।

अर्को आदेश जारी नभएसम्म यो निर्णय कायम रहने जनाइएको छ । भारतले यसअघि ‘प्रतिबन्धित’ श्रेणीमा राखिएको चिनी निर्यातलाई अब ‘निषेधित’ श्रेणीमा राखेको छ ।

Advertisement

सरकारका अनुसार आन्तरिक बजारमा चिनीको पर्याप्त मौज्दात कायम राख्न, उपभोक्तालाई सहज आपूर्ति सुनिश्चित गर्न तथा मूल्यवृद्धि नियन्त्रण गर्न यस्तो कदम चालिएको हो । भारत विश्वकै प्रमुख चिनी उत्पादक तथा निर्यातकर्ता राष्ट्रमध्ये एक भएकाले यो निर्णयले अन्तर्राष्ट्रिय बजारमा समेत प्रभाव पार्ने अनुमान गरिएको छ ।

विशेषगरी भारतबाट चिनी आयात गर्ने दक्षिण एसियाली मुलुकहरूमा यसको असर देखिन सक्ने बताइएको छ । यद्यपि, युरोपेली संघ र अमेरिकातर्फ तोकिएको कोटाअन्तर्गत हुने निर्यातमा भने प्रतिबन्ध लागू नहुने स्पष्ट गरिएको छ ।

त्यस्तै, अग्रिम अनुमति योजनाअन्तर्गत हुने निर्यात प्रक्रिया पनि हालकै व्यवस्थाअनुसार सञ्चालन हुने जनाइएको छ । भारत सरकारले यो निर्णय तत्काल लागू भएको जनाएको छ ।