स्कटल्यान्ड पराजित हुँदा नेपाल पाँचौं स्थानमा उक्लियो

काठमाडौं । स्कटल्यान्डलाई ६ विकेटले पराजित गर्दै नेपालले आईसीसी विश्वकप लिग–२ अन्तर्गतको खेलमा महत्वपूर्ण जित हासिल गरेको छ ।

यो जितसँगै अंकतालिकामा सुधार गरेर नेपाल पाँचौं स्थानमा उक्लिएको छ । त्रिवि अन्तर्राष्ट्रिय क्रिकेट मैदानमा सोमबार टस जितेर पहिले ब्याटिङ गरेको स्कटल्यान्ड ३९.१ ओभरमा सबै विकेट गुमाउँदै १९४ रनमा सीमित भयो ।

Advertisement

उसका लागि ब्रान्डन म्याकमुलेनले ७३ रनको सर्वाधिक स्कोर बनाए । माइकल इङ्ग्लिसले ५१ रनको योगदान गरे पनि अन्य ब्याटरले उल्लेखनीय प्रदर्शन गर्न सकेनन् ।

नेपालका बलरमध्ये स्पिनर ललित राजवंशीले उत्कृष्ट प्रदर्शन गर्दै ४ विकेट लिए । सन्दीप लामिछानेले ३ विकेट हात पारे । सोमपाल कामी, दीपेन्द्र सिंह ऐरी र नन्दन यादवले १–१ विकेट लिए ।

१९५ रनको लक्ष्य पछ्याउँदै नेपालले ३८.१ ओभरमा ४ विकेट गुमाएर १९९ रन बनाउँदै सहज जित दर्ता गर्‍यो । ओपनर आसिफ शेख र कुशल भुर्तेलले ५८ रनको साझेदारी गर्दै राम्रो सुरुवात दिलाए । आसिफ २९ रनमा रनआउट भए भने कुशल भुर्तेल २८ रनमा आउट भए ।

इशान पाण्डेले ५५ रनको अर्धशतकीय इनिङ खेल्दै नेपालको जितको आधार तयार पारे । कप्तान रोहित पौडेलले अविजित ७४ रन पारी खेल्दै टोलीलाई जितसम्म पुर्‍याए । दीपेन्द्र सिंह ऐरी २ रनमा आउट भए भने आरिफ शेख अविजित ८ रनमा रहे ।

त्यसअघि स्कटल्यान्डका बलर मार्क वाटले २ विकेट लिएका थिए भने ब्रान्डन म्याकमुलेनले १ विकेट लिए । यस जितसँगै नेपालले शृंखलामा दोस्रो सफलता हात पारेको छ ।

पहिलो खेलमा नेपाल स्कटल्यान्डसँग २ रनले पराजित भएको थियो भने दोस्रो खेलमा अमेरिकालाई ९ विकेटले हराएको थियो । हाल नेपाल २२ अंकसहित लिग–२ को तालिकामा पाँचौं स्थानमा पुगेको छ ।