भूकम्पपछि सात हजारभन्दा बढीलाई सुरक्षित स्थानमा सारियो

एजेन्सी । चीनको दक्षिणी ग्वाङ्सी झुआङ स्वायत्त क्षेत्रअन्तर्गत लिउझोउ सहरमा सोमबार बिहान ५.२ म्याग्निच्युडको भूकम्प गएको छ ।

लिउनान जिल्लालाई केन्द्रबिन्दु बनाएर गएको उक्त भूकम्पको गहिराइ करिब आठ किलोमिटर रहेको बताइएको छ । भूकम्पका कारण १३ वटा भवन भत्किएका छन् भने सात हजारभन्दा बढी स्थानीयलाई सुरक्षित स्थानमा सारिएको विभिन्न सञ्चारमाध्यमले जनाएका छन् ।

Advertisement

घटनामा तीन जना बेपत्ता भएका छन् । चार जना घाइते भई अस्पतालमा उपचाररत छन् । बेपत्तामध्ये केही व्यक्ति भग्नावशेषभित्र फसेको आशंका गरिएको छ ।

भूकम्पअघि र पछि २.२ देखि ३.२ म्याग्निच्युडसम्मका पाँचवटा पराकम्प पनि महसुस गरिएको थियो । सबैभन्दा बढी क्षति लिउनान जिल्लाको ताइयाङछुन टाउनसिपस्थित साङदेङ गाउँमा भएको बताइएको छ । उक्त स्थानमा केही भवन पूर्ण रूपमा ध्वस्त भएका छन् ।

उद्धार तथा खोजी कार्यका लागि आपतकालीन सेवा, प्रहरी र दमकल टोली परिचालन गरिएको छ । ग्वाङ्सी क्षेत्रीय प्रशासनले लेभल–३ आपतकालीन प्रतिक्रिया लागू गरेको छ भने केन्द्रीय सरकारले पनि लेभल–४ आपतकालीन प्रतिक्रिया सक्रिय गर्दै थप कार्यदल पठाएको छ ।

भूकम्पपछि ताइयाङछुन क्षेत्र हुँदै जाने सडकमा पहिरो जाँदा यातायात अवरुद्ध भएको छ । स्थानीय प्रशासनले वैकल्पिक मार्ग प्रयोग गर्न आग्रह गरेको छ । उद्धार कार्य तीव्र पारिएको र प्रभावित क्षेत्रमा सहायता परिचालन गरिएको जनाइएको छ ।