हलमा ‘काजी’ र ‘मितज्यू’ को भिडन्त 

काठमाडौं । नेपाली फिल्म प्रेमीहरूका लागि यो साताको शुक्रबार विशेष बनेको छ । आजदेखि देशभरका सिनेमा हलहरूमा दुई बहुप्रतिक्षित नेपाली फिल्म ‘काजी’ र ‘मितज्यू’ एकसाथ प्रदर्शनमा आएका छन् । फरक कथावस्तु र फरक स्वाद बोकेका यी दुवै फिल्मले दर्शकलाई हलसम्म तान्ने अपेक्षा गरिएको छ ।

निर्देशक लक्ष्मण रिजालको निर्देशनमा तयार भएको ‘काजी’ विशुद्ध प्रेम कथामा आधारित फिल्म हो । यस फिल्ममा अभिनेता विपिन कार्की र प्रतिभाशाली अभिनेत्री केकी अधिकारीको जोडी मुख्य आकर्षणका रूपमा रहेका छन् ।

काजी र कजिनीको सम्बन्ध, मानवीय संवेदना र सामाजिक परिवेशलाई केन्द्रमा राखेर बनाइएको फिल्ममा गरिमा शर्मा, प्रकाश घिमिरे, विशाल पहारी र हेमन्त बुढाथोकी लगायतका कलाकारको अभिनय छ । प्रदीप भारद्वाजको कथा रहेको यस फिल्मलाई सेन्सर बोर्डले ‘युनिभर्सल सर्टिफिकेट’ दिएको छ, जसको अर्थ यो फिल्म सपरिवार बसेर हेर्न सकिन्छ । फिल्ममा कालीप्रसाद बास्कोटाको संगीत र कविराज गहतराजको नृत्य निर्देशन रहेको छ ।

अर्कोतर्फ, ग्रामीण जीवन र मित्रताको गहिरो सम्बन्ध बोकेको फिल्म ‘मितज्यू’ पनि आजैबाट प्रदर्शनमा आएको छ । अनिल बुढा मगर निर्देशित यस फिल्ममा नेपाली फिल्मका ढुकढुकी मानिने दयाहाङ राई र सौगात मल्लको मुख्य भूमिका छ ।

यस फिल्ममार्फत चर्चित डान्सर टेरिया फौजा मगरले नेपाली रजतपटमा डेब्यु गरेकी छिन्, जसका कारण पनि दर्शकमाझ थप कौतूहल छ । फिल्मका ‘गैराघरे काँइली’ र ‘भुनभुन माहुरी’ जस्ता गीतहरू सामाजिक सञ्जालमा पहिले नै हिट भइसकेकाले फिल्मले युवा दर्शकको राम्रो साथ पाउने देखिएको छ । शिशिर विशंखेको छायांकन र श्रीकृष्ण बम मल्लको संगीत रहेको यो फिल्मले पनि ‘युनिभर्सल सर्टिफिकेट’ नै पाएको छ ।

एकातिर विपिन र केकीको जोडी अनि अर्कोतिर दयाहाङ र सौगातको सदावहार जोडी । दुवै फिल्म पारिवारिक र सामाजिक विषयवस्तुमा आधारित रहेकाले यति बेला फिल्म वृत्तमा कुन फिल्मले बाजी मार्ने हो भन्ने चर्चा सुरु भएको छ ।

‘काजी’ लाई श्रीराम बालाजी फिल्मस् र ‘मितज्यू’ लाई आरआर  फिल्मस् ले देशभर वितरण गरेका छन् । लामो समयपछि दुई ठुला ब्यानर र नाम चलेका कलाकारका फिल्महरू जुध्दा यसले समग्र नेपाली चलचित्रको बजारलाई चलायमान बनाउने आशा गरिएको छ ।