महानगरपालिकाका मेयरसहित ४ जनाविरुद्ध पक्राउ पुर्जी जारी

वीरगन्ज । जिल्ला अदालत पर्साले लिखित सम्बन्धी कसुर (किर्ते) मुद्दामा वीरगन्ज महानगरपालिकाका मेयर राजेशमान सिंहसहित चार जनाविरुद्ध पक्राउ पुर्जी जारी गरेको छ ।

सरकारी वकिल कार्यालयले गत जेठ १ गते मेयर सिंहसहित ४ जनाविरुद्ध मुद्दा दायर गरेपछि अदालतले पक्राउका लागि अनुमति दिएको हो । लिखित सम्बन्धी कसुरमा मुलुकी अपराध संहिता २०७४ को दफा २७६ को उपदफा १, २ र ३ (ग) बमोजिम सरकारी वा सार्वजनिक लिखित किर्ते गरेको अभियोगमा उनीहरूमाथि मुद्दा चलाइएको हो ।

Advertisement

उक्त कानुनी व्यवस्था अनुसार कसुर पुष्टि भएमा सात वर्षसम्म कैद र ७० हजार रुपैयाँसम्म जरिवाना हुनसक्ने माग दाबीसहित ३५ दिने पक्राउ पुर्जी जारी गरिएको जिल्ला अदालतले जनाएको छ ।

पक्राउ पुर्जी जारी हुनेहरूमा मेयर राजेशमान सिंह, महानगरका पञ्जिकरण अधिकारी भिखारी रायसहित चार जना रहेको प्रहरीले जनाएको छ ।

यो मुद्दा सरकारी कागजात किर्ते गरी काम गरेको विषयसँग सम्बन्धित रहेको बताइएको छ । अदालतबाट पक्राउ पुर्जी जारी भएसँगै प्रहरीले उनीहरूको खोजी र थप अनुसन्धान प्रक्रिया अगाडि बढाउने बताएको छ ।