मिल्स गोल्डकपको उपाधिका लागि विराटनगर र पुलिस खेल्दै 

विराटनगर । विराटनगरमा जारी छैटौँ  मिल्स गोल्डकप फुटबल प्रतियोगिताको फाइनल कोशी प्रदेश प्रहरी कार्यालय विराटनगर पुगेको छ ।

मिल्स गोल्डकप फुटबल ट्रस्टले आयोजना गरेको प्रतियोगिताअन्तर्गत बिहीबारको खेलमा विराटनगरको कोशी प्रदेश प्रहरी कार्यालयले विराटनगर रानीको लालीगुराँस फुटबल क्लबलाई टाइब्रेकरमा ४–२ गोलमा हराउँदै फाइनलमा पुगेको हो ।

खेलको निर्धारित समयमा दुवै टोलीबाट गोल नभएपछि खेलको निर्णय टाइब्रेकरबाट भएको थियो ।

टाइब्रेकरमा पुलिसका सविन राई, नितेश लिम्बू, हेम तामाङ र संजय चौधरीले गोल गरे भने रमेश राजवंशीको प्रहार बाहिरिएको थियो । लालीगुराँसका तर्फबाट आशिष लावती र पुजन थापाले मात्र गोल गरे भने कैलाश बस्नेत प्रहार बाहिर जाँदा युवन राईको प्रहारलाई पुलिसका गोलकिपर सजिन चौधरीले बचाउ गरे ।

खेलको प्लेयर अफ द म्याच पुलिसका गोलकिपर सजिन चौधरीले २ हजार १ सय रुपैयाँ पुरस्कार प्राप्त गरे ।
प्रतियोगिताको उपाधिका लागि शनिबार पुलिस र विराटनगरकै टीडब्लुसीवाईबीच प्रतिस्पर्धा हुने आयोजकले जनाएको छ । प्रतियोगिताको विजेताले २ लाख १ हजार १११ रुपैयाँ र उपविजेताले १ लाख १ हजार १११ रुपैयाँ प्राप्त गर्ने छन् ।