इजरायलमाथि अमेरिकाको जासुसी आरोप

एजेन्सी । अमेरिका र इजरायलबीच इरानको विषयलाई लिएर तनाव बढिरहेका बेला इजरायलमाथि अमेरिकी अधिकारीहरूको जासुसी गरेको आरोप लागेको छ ।

अमेरिकी सञ्चारमाध्यम एनबीसी न्यूजका अनुसार पेन्टागनअन्तर्गतको डिफेन्स इन्टेलिजेन्स एजेन्सी (डीआईए)ले इजरायलसँग सम्बन्धित काउन्टर–इन्टेलिजेन्स खतरा बढेको निष्कर्ष निकालेको छ । रिपोर्टअनुसार अमेरिकी अधिकारीहरूले इजरायलले ट्रम्प प्रशासनका आन्तरिक गतिविधि र संवेदनशील जानकारी संकलन गर्न खोजेको आशंका गरेका छन् ।

Advertisement

डीआईएले यसलाई गम्भीर सुरक्षा सतर्कताका रूपमा लिएको बताइएको छ । यद्यपि, इजरायलले भने सबै आरोप अस्वीकार गरेको छ । वासिङ्टनस्थित इजरायली दूतावासले आफूहरूले अमेरिकी अधिकारीमाथि जासुसी नगर्ने र आफ्ना गुप्तचर निकायले शत्रु देशमाथि निगरानी गर्ने दाबी गरेको छ ।

अमेरिकी अधिकारीहरूका अनुसार इजरायल भ्रमण गर्ने वरिष्ठ अमेरिकी अधिकारीहरूलाई पहिलेदेखि नै विशेष सावधानी अपनाउन निर्देशन दिइँदै आएको छ । उनीहरूले इजरायलमा रहँदा आफ्नो नियमित मोबाइल र ल्यापटप प्रयोग नगरी बर्नर फोन तथा विशेष कम्प्युटर प्रयोग गर्ने गरेका छन् । संवेदनशील विषयमा होटल वा निगरानी हुन सक्ने स्थानमा छलफल नगर्न पनि सचेत गराइन्छ ।

अमेरिकी सुरक्षा निकायहरूले इजरायली गुप्तचर संयन्त्रलाई सूचना संकलनमा आक्रामक मान्ने गरेका छन् । यद्यपि, खतरा स्तर बढाउनुपर्ने कुनै एउटै ठूलो घटना नभई विभिन्न घटनाक्रम र मूल्यांकनपछि यस्तो निर्णय लिइएको बताइएको छ ।

यो विवाद इरानलाई लिएर अमेरिकी राष्ट्रपति डोनाल्ड ट्रम्प र इजरायली प्रधानमन्त्री बेन्जामिन नेतन्याहुबीच मतभेद बढिरहेका बेला सार्वजनिक भएको हो । ट्रम्प प्रशासन इरानसँग नयाँ सम्झौताको प्रयासमा रहेको छ भने नेतन्याहु इरानमाथि कडा दबाब जारी राख्नुपर्ने पक्षमा छन् । लेबनानमा हिजबुल्लाहविरुद्धको सैन्य अभियानलाई लिएर पनि दुई देशबीच मतभेद देखिएको छ ।

यसअघि पनि अमेरिका र इजरायलबीच जासुसीका विषयमा विवाद हुँदै आएका छन् । सन् १९८५ मा अमेरिकी नौसेनाका गुप्तचर कर्मचारी जोनाथन पोलार्डले गोप्य दस्तावेज इजरायललाई दिएको आरोपमा पक्राउ परेका थिए ।

त्यस्तै, सन् २०१९ मा ह्वाइट हाउस आसपास फेला परेका ‘स्टिङ्ग्रे’ उपकरणलाई लिएर पनि इजरायलमाथि आशंका गरिएको थियो । तर, इजरायलले ती सबै आरोप अस्वीकार गर्दै आएको छ ।