महिला स्वास्थ्य सुधार्न विश्वव्यापी आह्वान

एजेन्सी । विश्वभर महिलाहरूले पुरुषहरूको तुलनामा झन्डै २५ प्रतिशत बढी समय खराब स्वास्थ्य अवस्थामै बिताउने गरेको नयाँ अन्तर्राष्ट्रिय अध्ययनले देखाएको छ ।

विश्व आर्थिक मञ्च र म्याकिन्से हेल्थ इन्स्टिच्युटको सहकार्यमा २० भन्दा बढी स्वास्थ्य संस्था तथा विज्ञहरूको सहभागितामा गरिएको अध्ययनले महिलाको स्वास्थ्यमा देखिएको ठूलो अन्तर रोकथाम तथा सुधारयोग्य रहेको निष्कर्ष निकालेको हो । अध्ययनअनुसार महिलाहरू औसतमा पुरुषभन्दा लामो आयु बाँच्ने भए पनि उनीहरूले आफ्नो जीवनको धेरै हिस्सा विभिन्न रोग, अशक्तता तथा स्वास्थ्य समस्यासँग संघर्ष गर्दै बिताउछन् ।

Advertisement

महिलाले जीवनभर औसतमा करिब नौ वर्ष खराब स्वास्थ्यमा बिताउने गरेको अध्ययनले देखाएको छ । प्रतिवेदनले महिला र पुरुषबीचको स्वास्थ्य अन्तरको करिब ३४ प्रतिशत हिस्सा स्वास्थ्य सेवा प्रणालीका कमजोरीहरूका कारण सिर्जना भएको उल्लेख गरेको छ । ढिलो रोग पहिचान, पर्याप्त परीक्षणको अभाव, उपचारमा असमान पहुँच, महिलासम्बन्धी रोगमा सीमित अनुसन्धान तथा उपचार प्रक्रियामा लैंगिक संवेदनशीलताको कमी यसका प्रमुख कारण रहेको अध्ययनले जनाएको छ ।

अध्ययनले तत्काल सुधारको सम्भावना रहेका नौ प्रमुख स्वास्थ्य अवस्थाहरू पनि पहिचान गरेको छ । तीमध्ये हृदय रोग, पाठेघरको मुखको क्यान्सर, स्तन क्यान्सर, गर्भावस्थामा हुने उच्च रक्तचाप, प्रसवपछिको अत्यधिक रक्तस्राव, प्रिमेन्स्टुअल सिन्ड्रोम (पीएमएस), माइग्रेन तथा एन्डोमेट्रियोसिस प्रमुख छन् । यी रोग तथा अवस्थाहरूमा समयमै पहिचान, उपचार र लगानी बढाउन सके महलाको स्वास्थ्यमा उल्लेखनीय सुधार ल्याउन सकिने अध्ययनको निष्कर्ष छ ।

प्रतिवेदनका अनुसार महिला स्वास्थ्यमा रहेको अन्तरका कारण विश्वभर हरेक वर्ष करिब ७ करोड ५० लाख वर्ष बराबरको स्वस्थ जीवन असामायीक मृत्यु हुने गरेको छ । यसले महिलाको व्यक्तिगत जीवन मात्र नभएर परिवार, समुदाय र समग्र अर्थतन्त्रमा समेत नकारात्मक प्रभाव पारिरहेको अध्ययनले देखाएको छ।

अध्ययनले महिलाको स्वास्थ्यमा लगानी बढाउँदा सन् २०४० सम्म विश्व अर्थतन्त्रमा वार्षिक कम्तीमा १ ट्रिलियन अमेरिकी डलर बराबरको अतिरिक्त आर्थिक लाभ सिर्जना हुन सक्ने अनुमान गरेको छ । प्रतिवेदनअनुसार महिलाको स्वास्थ्यमा लगानी गरिएको प्रत्येक १ डलरले करिब ३ डलरसम्म आर्थिक प्रतिफल दिन सक्ने सम्भावना रहेको छ ।

प्रतिवेदनले महिलाको स्वास्थ्य सुधारलाई स्वास्थ्यसम्बन्धी विषय मात्र नभई सामाजिक न्याय, लैंगिक समानता र आर्थिक समृद्धिसँग प्रत्यक्ष जोडिएको मुद्दाका रूपमा लिनुपर्नेमा जोड दिएको छ ।