कतार र स्विट्जरल्यान्ड बराबरी

क्यालिफोर्निया । फिफा विश्वकप अन्तर्गत समूह ‘बी’ को खेलमा कतारले अन्तिम क्षणसम्म संघर्ष गर्दै स्विट्जरल्यान्डसँग १–१ गोलको बराबरी निकाल्न सफल भएको छ । क्यालिफोर्नियाको सान्ता क्लारास्थित लेभाइस स्टेडियममा सम्पन्न खेलमा इन्जुरी समयको गोलले कतारलाई हारबाट जोगाएको हो ।

खेलको अधिकांश समय स्विट्जरल्यान्डले नियन्त्रणमा राख्दै अग्रता कायम गरे पनि अन्तिम समयमा डिफेन्डर बुआलेम खुखी नायक बने । इन्जुरी समयको पाँचौँ मिनेटमा उनले हेडमार्फत गोल गर्दै कतारलाई महत्वपूर्ण एक अंक दिलाए ।

Advertisement

स्विट्जरल्यान्डले खेलको १७औँ मिनेटमा अग्रता लिएको थियो । त्यसअघि १३औँ मिनेटमा कतारी गोलरक्षक महमुद अबुनादाले स्विस स्ट्राइकर ब्रिल एम्बोलोलाई पेनाल्टी क्षेत्रभित्र फल गरेपछि रेफ्रीले पेनाल्टी दिएका थिए । अबुनादाले पहेँलो कार्ड समेत पाए ।

पेनाल्टी प्रहारका लागि आएका एम्बोलोले कुनै गल्ती नगरी बललाई गोलपोस्टको माथिल्लो कुनामा पठाउँदै टोलीलाई १–० को अग्रता दिलाए । अमेरिका प्रवेशका लागि भिसा प्रक्रियामा कानुनी अड्चन झेलेका एम्बोलोले विश्वकपमा आफ्नो प्रभावशाली उपस्थितिको सुरुआत गोलमार्फत गरेका हुन् ।

पहिलो हाफमा स्विट्जरल्यान्डले थप केही अवसर सिर्जना गरे पनि त्यसलाई गोलमा परिणत गर्न सकेन । मौसम अत्यधिक गर्मी भएकाले विश्रामका क्रममा मैदानमा स्प्रिंकलरसमेत चलाइएको थियो ।

कतारले पनि सुरुवातदेखि नै केही राम्रो अवसर बनाएको थियो । खेलको दोस्रो मिनेटमै एडमिल्सन जुनियर गोल गर्न नजिक पुगेका थिए । तर, स्विस गोलरक्षक ग्रेगर कोबेलले उत्कृष्ट बचाउ गरे । दोस्रो हाफमा पनि कोबेलले अहमद अलाअल्दिनको खतरनाक प्रहार रोक्दै स्विट्जरल्यान्डलाई अग्रतामा राखेका थिए ।

तर, खेल समाप्त हुन केही क्षण मात्रै बाँकी रहँदा स्विस रक्षापंक्ति चुक्यो । त्यसको फाइदा उठाउँदै खुखीले गरेको हेडर गोलले कतारी समर्थकलाई उत्साहित बनायो र खेल बराबरीमा टुंगियो ।

प्रशिक्षक मुराट याकिनको नेतृत्वमा रहेको स्विट्जरल्यान्ड छनोट चरणभर अपराजित रहँदै लगातार छैटौँ पटक विश्वकपमा सहभागी भएको टोली हो । सन् २००२ यता कुनै पनि विश्वकप नछुटाएको स्विस टोली यसपटक पनि बलियो प्रदर्शन गर्ने लक्ष्यमा छ ।

यता स्पेनी प्रशिक्षक जुलेन लोपेटेगुईको नेतृत्वमा रहेको कतारले प्लेअफमार्फत विश्वकप यात्रा तय गरेको थियो । सन् २०२२ को घरेलु विश्वकपमा समूह चरणका सबै खेल गुमाएर निराश बनेको कतारले यसपटक भने पहिलो खेलमै संघर्षपूर्ण प्रदर्शन गर्दै सकारात्मक सुरुवात गरेको छ ।