भोजिन्हाको चमत्कारी प्रदर्शनले स्पेन अंक बाँड्न बाध्य

अमेरिका । विश्वकप २०२६ को उपाधि दाबेदार मानिएको स्पेनले प्रतियोगिताको सुरुआतमै अप्रत्यासित नतिजा बेहोरेको छ । समूह ‘एच’ अन्तर्गतको खेलमा स्पेन नवप्रवेशी अफ्रिकी टोली केप भर्डेसँग गोलरहित बराबरीमा रोकिएको हो ।

स्पेनको लगातार आक्रमण र गोलको अवसरलाई केप भर्डेका ४० वर्षीय गोलरक्षक भोजिन्हाले विफल पार्दै टोलीलाई ऐतिहासिक अंक दिलाए । खेलभरि उनले स्पेनका खतरनाक प्रहारहरू रोकेर उत्कृष्ट प्रदर्शन गरेपछि अन्तिम समयमा पुग्दा केप भर्डेका खेलाडीहरूले जित हासिल गरेझैँ खुसी मनाएका थिए । भोजिन्हाको उत्कृष्ट प्रदर्शनसँगै टोलीको अनुशासित, संयमित र रक्षात्मक खेल सम्झनलायक रह्यो ।

गोलरहित बराबरीपछि दुवै टोलीले एक–एक अंक बाँडेका छन् । तर, प्रतियोगिताको प्रमुख उपाधि दाबेदारमध्ये एक मानिएको स्पेनका लागि यो नतिजाले समूह चरणको यात्रा थप चुनौतीपूर्ण बनाएको छ । अब स्पेनले समूह ‘एच’ मा साउदी अरेबिया र उरुग्वेविरुद्ध प्रतिस्पर्धा गर्नुपर्नेछ ।

यही खेलमा स्पेनका युवा खेलाडी लामिन यामलले नयाँ कीर्तिमान पनि बनाए । १८ वर्ष ३३७ दिनको उमेरमा मैदान उत्रिएका उनी युरोपेली राष्ट्रकप २०२४ र विश्वकप २०२६ खेल्ने सबैभन्दा कम उमेरका युरोपेली खेलाडी बन्न सफल भए । यसअघि यो कीर्तिमान जुड बेलिङ्घमको नाममा रहेको थियो । उनले सन् २०२२ को विश्वकपमा १९ वर्ष १४५ दिनको उमेरमा पहिलो खेल खेलेका थिए ।

अर्कोतर्फ, ४० वर्ष १२ दिनका गोलरक्षक भोजिन्हाले स्पेनविरुद्धको प्रभावशाली प्रदर्शनसँगै विश्वकप खेल्ने सबैभन्दा पाका खेलाडीहरूको सूचीमा आफ्नो नाम लेखाएका छन् । उनको प्रेरणादायी प्रदर्शनका कारण केप भर्डेले विश्व फुटबलको शक्तिशाली टोली स्पेनलाई अंक बाँड्न बाध्य पार्दै प्रतियोगिताको सुरुआतमै ठूलो सन्देश दिएको छ ।