मेक्सिको अघिल्लो चरणमा

मेक्सिको । सहआयोजक मेक्सिको फिफा विश्वकप फुटबलको अन्तिम ३२ (राउण्ड अफ ३२)मा प्रवेश गरेको छ । समूह ‘ए’ अन्तर्गत शुक्रबार राति ग्वाडालाजारामा भएको खेलमा दक्षिण कोरियालाई १–० गोलले पराजित गर्दै मेक्सिकोले नकआउट चरणको यात्रा तय गरेको हो ।

मेक्सिकोको जितमा लुइस रोमो नायक बने । उनले खेलको ५०औँ मिनेटमा गरेको एकमात्र गोल नै निर्णायक सावित भयो । दक्षिण कोरियाले खेलभर बराबरी गोल फर्काउने प्रयास गरे पनि सफल हुन सकेन ।

लगातार दोस्रो जित निकालेको मेक्सिकोले दुई खेलबाट ६ अंक जोड्दै एक खेल बाँकी रहँदै नकआउट चरणमा स्थान सुरक्षित गरेको हो । पराजित दक्षिण कोरियाको भने दुई खेलबाट ३ अंक रहेको छ ।

समूह चरणको पहिलो खेलमा मेक्सिकोले दक्षिण अफ्रिकालाई पराजित गरेको थियो भने दक्षिण कोरियाले चेक रिपब्लिकमाथि जित निकालेको थियो । त्यसैले दोस्रो खेलको नतिजाले मेक्सिकोलाई अघिल्लो चरणमा पुर्‍याउँदा दक्षिण कोरियालाई अन्तिम खेलमा जितको दबाब बढाएको छ ।

सन् २०१८ को विश्वकपमा अन्तिम–१६ सम्म पुगेको मेक्सिको सन् २०२२ को संस्करणमा भने समूह चरणबाटै बाहिरिएको थियो । यसपटक घरेलु समर्थकमाझ खेलिरहेको मेक्सिकोले पुनः नकआउट चरणमा स्थान बनाउँदै आफ्नो दाबेदारी बलियो बनाएको छ ।

यस विश्वकपमा कुल ३२ टोली राउण्ड अफ ३२ मा पुग्ने व्यवस्था छ । प्रत्येक समूहका शीर्ष दुई टोलीले स्वतः स्थान बनाउनेछन् भने तेस्रो स्थानमा रहने टोलीहरूमध्ये उत्कृष्ट ८ टोलीले पनि नकआउट चरणमा अवसर पाउनेछन् ।