संघर्षपूर्ण पुनरागमनसँगै चार पटकको विश्व विजेता जर्मनी नकआउट चरणमा

अमेरिका । चार पटकको विश्व विजेता जर्मनीले संघर्षपूर्ण प्रदर्शनका बीच आइभरी कोस्टमाथि २–१ को पुनरागमन जित निकाल्दै अन्तिम खेलअघि नै विश्वकप फुटबलको नकआउट चरणमा स्थान सुरक्षित गरेको छ ।

इन्जुरी समयमा डेनिज उन्डाभले गरेको निर्णायक गोलले जर्मनीलाई महत्वपूर्ण तीन अंक दिलाएको हो । खेलको ३०औँ मिनेटमा आइभरी कोस्टका कप्तान फ्राङ्क केस्सीले गोल गर्दै अफ्रिकी टोलीलाई अग्रता दिलाएका थिए ।

पहिलो हाफमा पछाडि परेको जर्मनीले बराबरी गोलका लागि लगातार प्रयास गरे पनि सफलता हात पार्न सकेको थिएन । आइभरी कोस्टले पनि दोस्रो हाफमा केही राम्रो अवसर सिर्जना गरे पनि त्यसलाई गोलमा परिणत गर्न असफल रह्यो ।

दोस्रो हाफमा जर्मनीका प्रशिक्षक युलियन नागेल्समानले बेन्चका खेलाडीलाई मैदानमा उतार्दै खेलको लय परिवर्तन गर्ने प्रयास गरे । उनको रणनीति निर्णायक सावित भयो । ६८औँ मिनेटमा वैकल्पिक खेलाडी नादिम अमिरीले दिएको उत्कृष्ट क्रसमा डेनिज उन्डाभले आकर्षक फिनिसिङ गर्दै जर्मनीलाई १–१ को बराबरीमा फर्काए ।

खेल बराबरीतर्फ अघि बढिरहेको अवस्थामा इन्जुरी समयको चौथो मिनेटमा उन्डाभले व्यक्तिगत दोस्रो तथा टोलीका लागि निर्णायक गोल गर्दै जर्मनीलाई २–१ को जित दिलाए । अन्तिम क्षणको गोलसँगै जर्मनीले अन्तिम ३२ मा स्थान पक्का गरेको हो ।

उन्डाभको उत्कृष्ट प्रदर्शन आइभरी कोस्टका लागि भने पीडादायी बन्यो । हार बेहोरे पनि आइभरी कोस्टको नकआउट चरण पुग्ने सम्भावना भने समाप्त भएको छैन । समूह चरणको अन्तिम खेलमा उसले कुरासाओसँग प्रतिस्पर्धा गर्नेछ ।

यसअघि कुरासाओविरुद्धको उद्घाटन खेलमा जर्मनीले ७–१ को फराकिलो जित दर्ता गर्दा पनि उन्डाभले बेन्चबाट मैदान प्रवेश गर्दै एक गोल गरेका थिए भने दुई गोलका लागि अवसर सिर्जना गरेका थिए । लगातार दोस्रो खेलमा प्रभावशाली प्रदर्शन गरेका उनले जर्मनीका लागि ‘सुपर सब’को भूमिकालाई पुनः प्रमाणित गरेका छन् ।

संघर्षपूर्ण अवस्थाबाट पुनरागमन गर्दै प्राप्त गरेको यो जितले जर्मनीलाई उपाधि दाबेदार टोलीका रूपमा थप आत्मविश्वास दिलाएको छ । जर्मनीको जितसँगै प्रशिक्षक नागेल्समानको रणनीतिक निर्णय सफल सावित भएको छ ।